African Cup final-ah Ivory Coast

Kum kaw chhunga a vawi thumna atan Ivory Coast-in DR Congo 3-1 a hnehin Africa Cup of Nations-ah final an lut. Nizana inkhel Ghana leh Equatorial Guinea chak zawk nen Pathianni zanah final an khel ang.

Bata, Equatorial Guinea-ah Ivory Coast tan Yaya Toure, Gervinho leh Wilfried Kanon te'n goal an khung a, DR Congo tan Mbokani Bezua-a'n penalty aṭangin a khung ve bawk.

Golden generation

Yaya Toure, Gervinho, Wilfried Bony leh Seydou Doumbia te awmna Ivory Coast team hi 'Golden generation' tia koh an ni. An striker rinrawl ṭhin Didier Drogba-a'n ram tana inkhelh chawlhsan mah se tuna an player neihlaite hi Europe-ah pawh player ṭha an ni an phak.

Golden generation' tia koh nichungin Ivory Coast hian Drogba hunlai aṭang tawhin an ram tan trophy liant ham an la chawi lo. Kum 2006 leh 2012-ah te khan AFCON-ah final an lo khel tawh a, a chak lo zawkah an ṭang ve ve.

Semifinal chu

Ivory Coast hian Congo DR hi a tir aṭangin an ngam nghal hle. Minute 20-na lekah Manchester City midfielder Yaya Toure chuan kawh zetin Ivory Coast goal hmahruai a khung a; minute li hnuah Congo DR-in penalty aṭangin Dynamo Kyiv striker Mbokani Bezua hmangin an sut. Penalty hi box chhunga Ivory Coast defender Eric Bailly-a'n a kuta ball a khawih vanga pek a ni.

Ivory Coast lamin final thlen ngei tumin an nawr leh nghal a, minute 41-naah khel ṭha em em Roma forward Gervinho-a'n a pet goal a, first half-ah 2-1 a ni.

Second half-ah Congo DR tan Crystal Palace winger Yannick Bolasie a langsar nghal a, a pawimawh ber goal erawh a khung thei tlat lo. Minute 68-naah Ivory Coast bawkin goal an khung leh a, Gervinho corner pet aṭanga ball kal zel chu kum 21 leka upa Kanon chuan a pet goal.

Hun tawp hma ṭepin Gervinho chuan Ivory Coast tan a pet goal leh teuh hle. Goal dang luh belh tawh loin 3-1 in Ivory Coast an chak.

Manager thukhawchang

Ivory Coast boss Herve Renard chuan, "Player thawkrim tak tak leh talent nei ṭha tak inchawhpawlh kan ni. Kan tum ber chu champion a ni a, thil dangah chuan kan lungawi lo ang," a ti.

Ivory Coast hian kum 1992 hnuah African Cup an la chawi leh lo.