Lawrkhawm

Moyes-a'n chips ei a phal lo

Real Sociedad manager David Moyes chuan Manchester United manager a nih laiin chips ei a khap thu a sawi.
Everton boss hlui Moyes chuan, "Player ṭhenkhat kha an ritna tur pangngai bakin an rit tawh a, chips an ei khan an thau a belhchhah thei nia ka hriat avangin chips ei kha ka khap a ni," a ti.United player ho khan Sir Alex Ferguson hnuaiah khan chips an lo ei nasa ṭhin hle a, hei vang hian a tirah phei chuan chips ei loh thut kha harsa an ti hle a ni.
A bik takin United defender hlui Rio Ferdinand phei chuan a social media kaltlangin a lung­awiloh thu a tarlang.

Bertrand a hlim
Southampton defender Ryan Bertrand chuan Saints tana contract a ziak thei chu lawmawm a tih thu a sawi.
Chelsea defender hlui Bertrand hian season ṭan dawn khan Southampton hi loan-in a zawm a, January transfer-ah khan a nghetin a lut a ni.
Ryan Bertrand chuan, "He hmuna ka lo kal tirh khan ka hlim em em a, player nghet ka ni ve ta mai tur hian minti lawm lehzual a ni. Club-ah thil ropui tak tak kan thlen tir theih ngei ka beisei a ni," a ti.
English defender hian loan-a club hrang hranga chhuah reng chu a nin tawh thu a sawi tel bawk.

Champions League squad-ah Odegaard
Real Madrid-in an player thar kum 16-upa Martin Odegaard chu Real Madrid Champions League squad-ah an telh.
Real Madrid hian February 18 khian FC Schalke chu Champions League last 16-ah an tum dawn a, Odegaard hian khelhna hmun a chang a nih chuan Champions League chanchina player inlan thei naupang ber a ni dawn a ni.
Record dinglai mek chelhtu chu Nigeria international Celestine Babayaro a ni a, ani hian kum 16 leh ni 87 a upa a nihin Belgian club Anderlecht tan November 1994 khan Steaua Bucharest a lo hmachhawn tawh a ni.
Nilaini khan Odegaard hi Real Madrid B team tan a vawikhat nan Beijing Guoan nen friendly match an khelh ṭumin a inlan a, minute 60 chhung khelin a ṭhian-te goal thun tur vawi hnih a siamsak hman a, 3-3 in an inhnehtawk.
Odegaard hian Janua­ry khan Norway club Strømsgodset aṭangin Real Madrid a zawm.