National Games Football Punjabi aiin Mizo an lian!

West Bengal an hneh hnuah Punjab an hneh leh a, Mizoram football team chuan National Games football-ah semi final an lut.

Nilaini tlaia Cor-poration Stadium, Kozhikode, Kerala-a inkhelah David Lal­rinmuana leh MS Dawngliana-te goal hmangin Mizoram hian Punjab 2-0 in an hneh.

He mi hma hian West Bengal 2-0 bawkin an hneh a, khelh hnihah point ruk an hmu. Khelh khat la nei chungin group hmahruaitu an ni chiang tawh a, tukina Services an hneh loh pawhin an group-ah an sang ber tawh tho a ni.

Nilainia inkhel dangah West Bengal leh Services-te 2-2 in an inhnehtawk a ni.

Tute nge khel le?

Mizoram team hi West Bengal an hneh ṭumin midfielder Mal­sawmtluanga a inhliam a, Reuben Zosangpuia'n a thlak a, a bak zawng chu West Bengal an hneh ṭuma player ngaiin inkhel bul an ṭan.

Zothanmawia'n goal a veng a, tlar hnungah MPL-3 Best Player Lalramchullova bakah Lalrozama Fanai leh rawlthar pahnih Lal-

ṭhakima leh Thomas Lalengkima-te an ding. Midfield-ah captain David bakah Reuben leh Lalbiakthanga-te an awm a, tlar hmaah a laiah Zoramthara awmin a sirah Laldampuia leh Albert Zohmingmawia-te an awm.

Punjab hi Services 3-0 ngawta lo hneh tawh­tu an ni a, an pa lian a, tharum an ngah a, player tawnhriat ngah takte pawh an kawl.

An inkhel ta e

Team pahnih hi point thum hmu ve ve tawh an ni. Punjab lamin draw pawi an ti lo tih hriat takin an defender-te veng turin midfielder pahnih an dah a, Mizoram lamin a sir tawn tawnah an nawr.

Midfield-ah David, Reuben leh BT-a te ball thiam a ṭangkai a, a pa lian zawkin ball an chang hman meuh lo. Dampuia'n a tir lamah goal hlauhawm a nei nghal a, Albert-a Punjab defender-te chai tham khawpin a tlan chakin ball a thiam a, a hlauhawm ṭhin hle.

First half-ah goal a lut lo a, second half-ah Mizoramin goal an thun ta - West Bengal lama goal mawi tak mai thuntu David-a ball pet chu Punjab player-in lo khawih pialin goalkeeper man hman lohin minute 57-naah a goal.

Punjab lamin sût tumin nawr mah se goal hlauhawm an nei meuh lo a, minute 72-naa Aizawl FC leh Mizoram team captain David-a corner pet chu a pa sang lo ber mai Dawngtea chuan a tauh lut - MPL-2 Best Forward hi Dampuia thlaka lo lut a ni a, Punjab defender pa lian tak tak karah a tâl na hle.

Hun tawp dawnah Albert-a'n goal ban a tihper leh a, Punjab pawhin goal hlauhawm vawi thum vel an nei a, goal erawh an thun lo. Mizoramin goal chhuah loin semi final an lut ta.

Group hmahruaitu?

Group B-ah vawi hnih ṭheuh an khel tawh a, an indawt dan chu Mizoram (point 6), Punjab (3), West Bengal (1), Services (1) an ni.

Mizoram hi tukina inkhelah chak lo pawh ni se, point ruk hmu ve thei awm chhun chu Punjab an ni. Punjab hian point ruk hmu pawh ni se, 'head to head result' en a ni dawn a, Mizoram-in Punjab an hneh avangin Mizoram chu group hmahruaitu an ni chiang ta a ni.

Tukin dar 7:30 hian Mizoram-in Services an tum ang a, chawhnu lamah Punjab leh West Bengal an inkhel ang. Mizoram ni lo team dang pathumte hian semi final lut beiseina an la nei ṭheuh a ni. Semi final hi Inrinniah khelh a ni ang.

Coach thu leh hla

Mizoram coach K Malsawmmkima chuan, "Kan lawm khawp mai. Khelh khat la nei chunga group hmahruaitu kan ni hian chawlh hahdamna hun ṭha min pe dawn niin kan hria," a ti.

Mala chuan tukina Services an khelh turah an insiksawi dawn tih sawiin, "Player 20 kan hruai a, inhliam kan nei nual a, inhliam lo zinga la khel lo chu an khel vek ang. Kan player-te hi an ṭha tlang a, kan ring tawk vek a, a la khel lote pawh hi an chhe bik chuang lo a, chuvangin ṭha taka an khelh theih ka beisei," tiin a sawi.

Inhliam vanga an buaina sawiin, "Bengal nen MS-a a inhliam a, Punjab kan khelhin Rozama a inhliam leh a, player tawnhriat nei ṭha pahnih an ni a, semi final an khelh theih dawn leh dawn loh a la hriat loh. Kan striker rinrawl ber tura ngaih William-a Kerala kan thlen hnuah training-naah a inhliam a, David Thansanga a inhliam bawk a, player 20-ah 16 chiah dam ṭha an awm a; nimahsela hei hi football-in a ken tel a ni a, a dama-te hian theihtawp an chhuah ang a, kan ṭang hle a ni," a ti.