Goal 10 luhna MPL4 Playoff
Mizoram Premier League Season 4 khel tur zawnna thawhkhatnaah goal 10 a lut a, chak zawk an awm lo.
Upper Republic FC leh Reitlang FC te 5-5 in an inhnehtawk a, MPL4 Playoff thawhhnihna hi February 12-ah khelh leh tur a ni.
Nimin khan Lammualah MPL4 Playof khelh a ni a, Upper Republic tan Lalremruata'n goal hnih a khung bakah Laldinpuia, Lalruatpuia leh Ramdintluanga te'n goal khat ṭheuh an khung.
Reitlang FC tan Ricky Hlychho leh R. Lalthantluanga te'n goal hnih an khung a, Jesse Laldinpuia'n goal khat a khung ve bawk.
Upper Republic hun
Inkhelh chanve hmalamah first division club Upper Republic FC-in inkhel an thunun a, team pahnih tlar hnung a phui ṭhat tawk loh avangin goal chance pawh a tam hle.
Upper Republic-in minute lina lekah Lalremruata hmangin hma an hruai a, Laldinpuia hmangin minute 20-naah goal hnihna an khung leh bawk. Reitlang-in Ricky hmangin minute 26-naah goal khat khung mah se minute khat hnuah Lalruatpuia hmangin Upper Republic-in goal thumna an khung a, first half-ah 3-1 a ni.
First half-ah Upper Republic dihmun a ṭha a, goal chance an hlah avanga dinhmun ṭha zawka an awm lo erawh an tihsual lian tak a ni.
Reitlang hun
Second half-ah Jesse Laldinpuia hmangin Reitlangin minute 54-naah goal an khung a, minute kaw hnuah Upper Republic-in Remruata hmanga goal khung lehin 4-2 a ni.
Reitlang-in midfielder Lalnunzira an luhtir nghal a, Azira luh hnuah inkhel a danglam. MPL3-a pasarihna Reitlang-in inkhel an thunun a, Upper Republic tlar hnung phuahchhawp an talbuai bawk.
Reitlang forward Lalmama'n goal hnih a khung belh hnuah Ricky-a'n goal hnihna a khung a; minute 84-na zawhah Reitlang-in 5-4 in hma an hruai daih.
Reitlang an chak mai dawna a lan hnuah Upper Republic tan Ramdintluanga'n minute 89-naah he inkhela goal 10-na a khung a, 5-5 in inkhel a tawp.
Eng nge an sawi?
Upper Republic president R. Lalhrilliana chuan, "Player pawimawh pathum kan chhawr thei lo a, defender pahnih an awm loh avangin tlar hnung kan phuahchhawp deuh a ni. Tin, kan midfielder pawimawh Israel-a awm loh kan tuar a, game kan thunun thei lo a, kan chance neih kan hmang ṭangkai tawk lo bawk," tiin a sawi.
Hrila chuan sawi chhunzawmin, "Second leg kan khelh hunah chuan kan player-te an dam kim tawh ka beisei a, kan hneh theih ngei ka ring," tiin MPL khelh a inrin thu a sawi.
Reitlang coach lailawk Johny Lalawmpuia chuan, "Goal tamna inkhel kan lantir a, inkhel hmuhnawm tak a niin ka hria. Tihsual kan ngah a, inzir tur kan ngah a, second leg-a chak ngei turin uluk zawkin practice kan chhunzawm nghal ang," tiin a sawi.
Inkhel Result
Upper Republic FC 5 - 5 Reitlang FC
URFC : Lalremruata 4', 63'; Laldinpuia 20'; Lalruatpuia 27'; Ramdintluanga 89'
RFC : Ricky Hlychho 26', 84'; R. Lalthantluanga 66', 75'; Jesse Laldinpuia 54'