Bolt-a'n Covid-19 a kai

Usain Bolt chuan coronavirus a kai tih hmuhchhuah a ni a, an ram Jamaica-ah khunghran mek a ni. A tlan chak vanga hriat hlawh Bolt hian a kum 34 tlin cham a lawm hnu lawkah hripui hi a kai tih an hmuchhuak.

Thawhṭanni khan Bolt hian Twitter lamah hri a kai em tih an endikna result a nghah mek thu a tarlang, a hnuah Jamaica health ministry chuan Bolt hi hri leng laka a fihlim loh thu an tarlang zui a ni.

Olympic gold medal pariat neitu Bolt chuan, "Social media lama ka thil tarlan khan ka nihna a hrilhfiah, khung hran mek ka ni. Mitin mahni awm hmunah lo him ula, kei pawh ka chhungte leh ṭhiante lak aṭangin ka inthiar fihlim.

"Natna chu ka nei hran lo, kan ram sorkarin dan leh hrai a duante chu ka zawm tur a ni ang," a ti. Infiammi zingah Covid-19 kai mi tam tak an awm tawh a, mi hrisel ṭha pangngai zingah chuan hri hian natna a thlen nasa lem lo. Mipa 100m leh 200m intlansiaka world record chelhtu Bolt hian intlansiak pangngai chu a chawlhsan tawh a, a hnuah football training neiin club zawng mah se a duh anga khelhna tur a hmu mai lo a ni.