Mizo pathum khelhna Bengaluru FC Asian Champions League-ah chak lo

6th February, 2015

Nilaini khan Malaysia-ah AFC Champions League play-off khelh a ni a, I-League champions Bengaluru FC leh Malaysia Super League (MSL) champion Johor Darul Ta'zim FC-te intumin Malaysian club hi extra time-ah 2-1 in an chak.

Mizo player pathum khelhna Bengaluru FC hi AFC hnuaia an vawi khat inlanna a ni chungin an khel

ṭha hle a, hun pangngaia 1-1 a an inhnehtawk hnuah extra time-ah an vanduai ta a ni. Bengaluru hian AFC Champions League group stage an khel phak dawn ta lo a, AFC Cup erawh an khel thei ang.

Larkin Stadium, Johor, Malaysia-a mipui khat tlat hmaa inkhelah hian Bengaluru-a Mizo player pathum - Beikhokhei, Lalchhuanmawia leh Lalthuammawia Ralte-te chu starting XI-ah an awm vek a, inkhel an inhnehtawk hle. First half-ah goal a lut lo a, second half ṭan chiahah Harris Harun chuan corner aṭangin goal a thun a, Malaysian club-in hma an hruai.

Bengaluru lamin sût tumin an nawr na hle a, goal ban vawi hnih an tihper nghe nghe. Hun a tawp dawn tawh a, injury time-a corner an hmuh chu Shillong lam player Eugeneson Lyngdoh chuan a pet goal a, 1-1 a ni ta. Extra time an khel a, substitute Chanthuru Suppiah chuan Johor chakna goal a thun ta a ni.

Mizo thu leh hla

Nimin lam khan Bengaluru player-te hi India-ah an lo kir leh nghal a, inkhel a thlirin Thuammawia chuan a ui thu Vanglaini a hrilh a, "Kan inbei tawk a, kan chak loh dan a uiawm duh khawp mai. AFC Cup-ah theihtawp kan chhuah mai a ṭul dawn ta a ni. Kan khel ṭha khawp mai a, kan inhnehtawk hle a ni," tiin a sawi.

Season hmasa I League-a an champion-na kawnga Bengaluru FC player pawimawh Beikhokhei chuan, "Kan hneh lo bik lo a, kha khan a tiuiawm zualin ka hria. Goal ban vawi hnih kan tihper a, kan vanduai ve deuh bawk a ni," a ti.

Chhuante chuan, "Kan inbei tawk a, hun rei tak chu kan nawr bet reng zawk mawle... inkhelh a nuamin a boruak a sang khawp mai. Malaysia-ah chuan football an lo uar khawp mai a, fans an tamin stadium an khat vek a, Europe-a inkhel ang deuh hian inkhelh chhung zawng an zaiin an lam a, a boruak a nuam khawp mai," tiin Asian Champions League playoff chanchin a sawi.