Manchester City-in bazar zel an tum!

Premier League club Manchester City chairman Khaldoon Al Mubarak chuan, "Player lei belh kan la tum a ni," tiin transfer bazar an hmachhawn dan tur a sawi a, Pep Guardiola-a'n sum lamah buaina a nei dawn lo. 

City hian tun nipui transfer-ah squad tichhah turin Valencia aṭangin winger Ferran Torres leh Bournemouth aṭangin defender Nathan Ake te an lalut tawh a, duhtawk mai an tum dawn lo niin a lang. 

Pep-a enkawl team hian season hman zawh takah khan point 18 laiin Premier League champion Liverpool an phak lo a, Champions League-ah quarterfinal an paltlang zo lo bawk. 

City hian first team player pathum an chan tawh bawk a, Leroy Sane chu Bayern Munich lamah a kal laiin Claudio Bravo leh David Silva chu free transfer-in an chhuak bawk - an insingsa mek zel. 

Season hmasa Premier League-a City buaina ber nia lang chu tlarhnung a ni a, a bik takin centre back Aymeric Laporte inhliam laiin buaina an tawk nasa - league match kua ngawtah an chak lo. 

Pep-a'n tlarhnung lama an chak tawk lohna hriain transfer bazar-a a melh hmasak ber chu defender a ni a, pound maktaduai 40-in Bournemouth centre-back Nathan Ake a lalut. 

Spanish coach hian Sane chelh duh viau mah se a chelh thei lo a, pound maktaduai 54.8-in July thlatir khan Bayern lakah Sane hi a chan - Valencia aṭangin Ferran Torres a lalut ve zui. Pound maktaduai 21 man forward hi Sane nena khaikin tur em la ni lo mah se season hman zawh takah khan Valencia tan match 44 khelin goal ruk a khung a,  assist vawi riat a nei - kum 20 mi lek a la nih bawk avangin hmabak a nei êng hle. 

City-in player pahnih an lalut tawh a, transfer bazar lama an chet ṭhin dan enin a la tlem. Mahse, club chairman Khaldoon Al Mubarak chuan season khat lek chu an club dinhmun en nan an hman loh tur thu a sawi. 

Khaldoon Al Mubarak chuan, "Kum khat lek kan thlir lo. Kum thum, kum nga, kum 10 thlengin kan thlir a, chutah chuan inthlak danglam kan ngaihna leh hmasawn kan ngaihna kan en a, chumi mil chuan kan che ang. "Engkim uluk takin kan thlir dawn a, chutihrual chuan kan mamawhah chuan kan insum dawn lo. Ake leh Torres kan lakluh dan en u la, kan mamawhah chuan fing taka thil thlirin kan che ṭhin a ni," a ti. 

City hotupa chuan sawi zawmin, "Kan ruahmanna thlak kan tum lo a, player lakluh tur dang pawh kan la nei. Mahse, vawiin khawvela kan market dinhmun pawh thlir thiam a ngai ang," a ti a, Covid-19 vangin sum lamah an fimkhur ve tho thu a sawi. 

City Chairman ṭawngkam aṭangin an fimkhur thu sawi mah se sum lamah buaina lian a awm lo tih a chiang a, tun dinhmunah chuan City hi Kalidou Koulibaly nen ring taka sawizawm an ni. 

Napoli defender hi European football-a club langsar tak takin lakluh tumin an lo hel fo tawh ṭhin a, infiamna lama Italian chanchinbu lar La Gazzetta dello Sport chuan Napoli chu City dawrna ngaithla turin an inpeih tawh niin an sawi. 

Kum 29 mi defender hi Napoli hi man tlawm taka kaltir erawh an tum lo a, club president Aurelio Di Laurentiis chuan, "Man man taka min dawrtu an awm a nih loh chuan a chhuak kher lo ang," a ti. 

Serie A Team of the Year-a a zawna season li lang thei defender hian theihna a nei sang tih chu hai rual a ni lo a, City pawh hian an duh thu pha lo mah se official taka dawrna erawh an la nei rih lo thung - Koulibaly hian Thawhṭanni khan Napoli pre-season training a zawm. 

Barcelona chhuahsan duhtu Messi chu City nen hian sawizawm an ni a, mahse ngaihtuah tel tur tam tak a awm avangin English club hian lakluh duh pawh ni se tih tur tam tak a awm ang. 

Messi hian kum 2021 thleng cham turin contract a nei mek a, mahse Barcelona aṭanga lei chhuak tur chuan pound maktaduai 630 sen inhuam a ngaih thu a inziak tel thung. ESPN chuan City hian Messi lalut tura sum chet dan tur an zirchiang mek niin a sawi a, hei hian Messi man zat piahlamah a hlawh tur zat thlengin a huam tel - Messi hian kar khatah euro maktaduai khat chuang a hlawh nia sawi a ni. 

Hei mai a ni lo - City hian Messi an lakluha sum lama an hlawkna tur thlengin an ngaihtuah tel bawk a, Financial Fair Play dan bawhchhe si loa Messi lakluh dan an ngaihtuah tel bawk. 

Messi-a'n Barcelona chhuahsan a duh a, City bakah Paris Saint-Germain hming lam tel a ni. Argentine forward hian Pep Guardiola hnuaia khelh nuam a ti ber nia sawi a ni a, hei hian City lama kalna chance a ti sang hle. 

Chutihrual chuan City ang thoa sum lama buai lo PSG hian Messi ṭhianpa Neymar an kawl a, Messi hian Ronaldinho hnua a mimal anga khelhpui nuam a tih ber chu Neymar a ni - PSG hian an duh ve tak tak a nih chuan City tan ṭan lehzual a ngai ang. 

English club hian Barcelona player dang Sergi Roberto pawh an beisei nia sawi thawm a awm bawk a, kum 28 mi player hi Barca boss thar Ronald Koeman-a duh loh zingah a tel. 

Roberto hi midfielder ni mah se fullback, defensive midfield leh winger angin chhawr theih a ni a, Pep nen an inhriat ṭhat bawk avangin City a kal thut a nih pawhin a mak lo ang.