UEFA lakah City lawm lohna a awm lo

European football-a thuneitu sang ber UEFA chuan Manchester City hi Financial Fair Play dan an bawhchhiat avangin kum hnih chhung European football khel thei loin an lo hrem tawh a, mahse infiamna khawvela thuneitu sang ber Court of Arbitration for Sport chuan thla hmasa khan hremna hi a hlihsak. 

July thla khan City boss Pep Guardiola chuan a club chuan ngaihdam dil an phu thu a lo sawi tawh a, hetihlai hian club chairman Khaldoon Al Mubarak chuan UEFA lakah lung­awi lohna a neih loh thu a sawi. 

Khaldoon chuan, "Lawm lohna thinlunga pai reng tur chuan hringnun hi a tawi mah mah a ni. Champions League hi infiamna khawvela inelna hlu ber pawl a ni a, he inelnaa champion ngei pawh hi kan duh. 

"Chumi tur chuan inelna hi kan zah a ngai a ni. Tunah rih chuan thil pakhatin rilru a luah: he inelnaa nomawi beisei thei tura kan team puih a ni a, UEFA nena thawh hona ṭha tak neih a ni bawk. Chu chu kan kal zel dan tur a ni," tiin a sawi.