Chhun dar 12:30-ah Goal khung thiam Vs Goal veng thiam

LZ Juice MPL11-ah hmahruaitu Chanmari FC-in vawiin chhun dar 12:30-ah team thar Sihphir Venghlun an hmachhawn dawn. Lalsangzuala Hmar enkawl Chanmari hian goal an la chhuah lo a, goal veng thiam an ni. Chutihrualin Robert Laldinthara enkawl Sihphir Venghlun hian match hnuhnung pahnihah goal sarih khungin, goal khung thiam tia sawi theih an ni thung.

Goal veng thiam

Chanmari FC-in Santosh Trophy hnuhnung bera Mizoram captain Lalrinchhana Tochhawng aṭangin team an indin ṭan a, MPL4 best defender leh MPL9 best player hoin tlarhnung a phui ṭha hle. Rinchhana hian armband hreng ringawt ni loin team a ho ṭha a, captain nih a tlin.

Rinchhana kawppui turin Vanlalremruata leh Lalhmangaihsanga te an awm a, season liam taa Chawnpui tana khel Hmangaihsanga'n rin a hlawh rih zawk. Farkawn tlangval Hmangaihsanga hian thahrui a ngah a, Rinchhana nen an inkawp rem rih hle.

Santosh Trophy hnuhnung bera Mizoram right back K. Lalruatdika (Teka) leh left back Ephraim Lalremtluanga an kawl a, a thlakna tur an nei zel bawk. Left back-ah hian tawnhriat nei ṭha Sena Ralte an nei tel a, North Mualcheng tlangval hi Aizawl FC an hmachhawn ṭumin Ephraim aia dah luh a ni.

Goalkeeper-ah Zothanmawia an nei a, T. Mawia hian match thumah goal a chhuah lo. Republic Veng tlangval RS Lallawmzuala an kawl tel a, Lawma hi vawi khat inlan tawhin a clean sheet ve bawk.

Chanmariin goal an la chhuah loh chhan hi an vanneih vang a ni ngawt lo a, goal venghim tura player an lak ṭhat bakah player-te rem khawmtu coach Sanga an neih vang a tih theih. Sihphir Venghlun lakah pawh goal venhim leh ngei an tum ang.

Goal khung thiam

Sihphir Venghlun FC hian match hmasa berah SYS FC an hmachhawn a, goal chance insiam bawk mah se goal khung an harsat avangin 2-0 in an chak lo. Match hnihnaah Aizawl FC lakah goal khat khung mah se goal ruk ngawt an chhuah.

Team enkawltu Robert-a'n MPL hmachhawn turin game plan neih ṭhat ringawt a tawk lo tih a hria a, squad thuam chak hna an thawk. Match thumnaa Bethlehem an hmachhawn ṭumah an tlarhma an kim a; PC Lalruatsanga, Lalawmpuia leh Malsawmtluanga Pautu te awm tawhin 4-2 in an chak.

Season liam taah Sihphir Venghlunin First Division-ah attacking football an khel a, MPL match hmasa pahnihah an chhunzawm thei lo. Bethlehem lakah harhtharna changin attacking football an khel a, goal li ngawt an khung.

Match hnuhnung bera Ramhlun Athletic an hmachhawn ṭum pawhin hun rei lote chhungin goal hnih chhuah mah se goal thuma an chhanlet bakah chance ṭhahnem tak an insiam bawk.

Sihphir Venghlunin harhtharna an chan theih nan PC-a a pawimawh a, match hnihah goal li khungin man of the match-ah thlan a ni ve ve. Chutihrualin PC-a hian goal li ngawt khung mah se chance a hlah hnem a, Chanmari lakah chuan a hun ṭha neih bawhpelh a thiang lo.

PC-a chet ṭhat theih nan AwP-a a pawimawh a; Pune FC, DSK Shivajians, FC Goa, Hyderabad FC leh Sudeva Delhi vela khel tawh a nih avangin khelmualah a kawlhrawng a, match hnihah goal hnih a khung.

Malsawmtluanga Pautu hming lam hmaih a thiang lo a, ani hi ṭhiante siamsak kawngah a thawh hlawk. Chutihrualin midfielder thawkrim Lalbiakzuala lang lo lamah a ṭangkai a, season liam taa Chawnpui semifinal thlenpui player hi team innghahna a ni.

Engtin zel?

Chanmari hian striker Lalkhawpuimawia inhliam vangin chân mah se Lalnunzama leh MS Dawngliana te an la awm tho avangin talbuai tur an la ni lo. Zama leh Dawngtea te thlawp turin PC Rosangzuala a la awm bawk a, Chanmari tlarhma hi dah hniam theih an ni lo.

Chutihrualin Chanmari mual sir lama awm Moses Lalrinzuala, Vincent Lalduhawma, Lalrokima leh KC Malsawmsanga te hmuhnawm ṭhin viau mah se goal khung an la harsat. Goal an khung theih miau loh chuan team tan an ṭangkai tawk lo a, Sihphir Venghlun lakah insiamrem an tum ang.

Sihphir Venghlunin goal khung dan thiam tawh mah se goal ven dan an la thiam lo a, MPL11-ah goal 12 ngawt an chhuah tawh. MPL10-ah khan Chanmari FC-in league round-ah goal 14 an chhuah a, Sihphir Venglun hian match li lekah an tluk pha ṭep. Coach Robert-a hote hian tlarhnung an siam ṭha lo a nih chuan Chanmari lakah chak inbeisei ngam chi a ni lo.