A phu anga fak hlawh lo Muller

Thomas Muller hi football hming langsar ni mah se a phu ang tawk hian fak a hlawh tawk ṭhin lo. Euro 2024 zawhah Muller hian ram tana inkhelh a chawlhsan thu a puang a, Germany tana a inkhel hmuh tur a awm dawn tawh lo.

German forward Muller hi kum 34 mi a ni tawh a, club lamah chuan Bayern Munich tana chauha la khel ni mah se sulhnu a nei ṭha. Bundesliga-ah Muller hian goal 149 khungin league nomawi vawi 12 a chawi tawh a, DFB Pokal-ah vawi ruk champion tawhin UCL-ah vawi hnih a champion tawh bawk.

A bul ṭan dan

Muller hi Munich chhim lam Bavarian dil hnaia cheng a ni a, Bayern academy hi kum 10 a nihin a zawm. Tlarhma lam position hrang hrangah Muller hi a khel thei vek a, kum 2007 khan U19 Bundesliga semifinal leh final-ah goal a khung. Mahse, final-ah erawh Bayer Leverkusen lakah an vanduai.

Bayern Under 19 team tan hian match 29 khelin goal 18 a khung a, a record ṭhat vangin reserve team-ah koh a ni a, chutihrualin Jurgen Klinsmann hnuaiah first team zingah a training ṭhin bawk.

Klinsmann hian Muller hi ṭha a tih avangin 2008-09 season match hmasa berah khelhna hun a pe a, kum 18 mi Muller hian minute 79-naah Miroslav Klose a thlak. Hemi hnu hian reserve team-ah awm lehin tawnhriat ṭha zawk nei turin third division-ah an khel ta thung.

Muller a inlar ṭan

Klinsmann bawkin Muller hi khelhna hun ṭha dang a siamsak a, UCL last 16 first leg-ah Sporting Lisbon an hneh ṭumin Bastian Schweinsteiger a thlak. 2008-09 season tho la ni mah se Muller hi kum 19 mi a ni tawh a, Bayern tana a goal hmasa ber a khung.

Muller-a luh hian 4-1 a ni tawh a, inkhelh a zawh meuh chuan Bayern hi 7-1 in an chak. 2008-09 season hian Bundesliga leh UCL-ah inlan ve ve mah se club tan match nga chauh khelin goal khat chauh a khung.

Hei le, Muller chu

Louis van Gaal-a'n 2009-10 season aṭangin Bayern a enkawl ṭan a, Muller-a'n hmun pawimawh a chang nghal. Muller hian inelna hrang hrangah match 52 ngawt a khel a, goal 19 khungin Bundeslig leh DFB Pokal-ah Bayern a champion pui.

Hemi hnu hi chuan Muller leh nomawi hi inkawp tlat tiin a sawi theih a, Bayern-in German football an thunun theih nan Muller hi a pawimawh hle.

An hmuh hmaih lo

Bayern tana season tluana a khelh hmasak berah Muller hi club tana goal khung tam ber dawttu a ni a, Germany coach Joachim Low tan hmuh hmaih theih a ni tawh lo. March 2010 khan Argentina hmachhawn turin koh a ni a, mahse Muller hi ram tana a inlan hmasa berah 1-0 in an chak lo.

Muller hi 2010 FIFA World Cup khel tur zingah a tel zui a, khawvelin a theihna a hre ṭan. Germany-in match hmasa berah Australia 4-0 in an hneh a, goal leh assist a nei nghal.

Ghana an hneh ṭumin Mesut Ozil-a goal khung tur a siamsak a, last 16-ah England 4-1 in an sawp a, assist bakah goal hnih a nei bawk.

Quarterfinal leh pathumna zawnnaa Argentina leh Uruguay an hneh ṭumin goal a khung ve ve. Inelna pumpuiah Muller hian goal nga khungin David Villa, Wesley Sneijder leh Diego Forlan te nen goal khung zat inang mah se vawi thum assist neiin Golden Boot a dawng.

Khawvelin Muller an hria a, mah se a khelhna position hi, engah tak nge a khelh an chiang lo thung.

'Raumdeuter' chu

South Africa-a World Cup inelna neih zawhah Muller-a'n ngaihven a hlawh a, an zir chiang nasa bawk. Football scout Jan Pienta chuan, "A ke hi a ria sin ṭhawi a, a thiamna lah professional football khel turin a ṭha tawk em tiha zawh theih tur a ni," tiin a sawi.

Mahse, Muller chuan, "Mi hian ka ke chungchang hi fiamthu thawh nan an hmang ṭhin a, mahse ka nuin a tliak mai lo tih a hmu chhuak daih tawh. Ka tan pawh harsatna a ni lo a, youth level-ah chuan min puitu a ni zawk. Mi dang anga thahrui ka ngah ve loh avangin min sut loh nan ka thluak ka hman nasat a ngai," tiin a sawi fiah.

A khelh dan chungchang an zawh ṭumin Muller chuan, "Ka danglam bik. Ball khalh thei an awm a, striker an awm leh a, kei chu Ramdeuter ka ni. In chanchinbua in thupui tur chu in hmu e," tiin a sawi. Ramdeuter hi hmun awl siamtu tiin a sawi theih a, Muller hian ṭhiante tan hmun awl siamsak a thiam hle.

Football-a pawimawh shooting leh technique te chu zir theih a ni a, mahse hmun awl hman thiam erawh zir a harsa bik. Hei vang hian Muller hi mi bik tia sawi theih a ni.

A ropui e

Bayern hian 2010-11 leh 2011-12 season-ah Borussia Dortmund lakah league nomawi an chân a, UCL final-ah kum 2012 khan Chelsea an hneh lo bawk. Mahse, Muller-a telna Bayern chu 2012–13 season khan Bundesliga, DFB Pokal leh Champions League-ah an champion vek a, 2019–20 season khan Hansi Flick hoin an treble champion leh bawk.

World Cup 2014-ah Muller a ropui lehzual a, match hmasa bera Portugal 4-0 a an sawp ṭumin hattrick a siam nghal. Group match hnuhnung bera US an hneh ṭum pawhin goal awmchhun a khung. Germany hian semifinal-ah inelna thlengtu Brazil an hmachhawn a, Muller hian goal hmahruai khungin WC 2002 final-a an hneh loh Brazil chu 7-1 ngawtin an sawp.

Germany-in World Cup nomawi an chawi a, Muller hian Silver Ball dawngin goal nga a khung avangin Silver Boot a dawng a, World Cup All-Star XI-ah telh a ni bawk. Muller hian Bayern tan nomawi ṭhahnem tak chawi zui mah se Germany erawh a champion pui tawh lo thung.

Muller hian ram tan match 131 khela goal 45 khungin assist vawi 41 ngawt a nei a, World Cup-ah goal 10 ngawt a khung. A thiamna leh a chevel vangin mit a la tawk lo a ni thei a, mahse team tana a inpekna erawh hmuh hmaih theih a ni lo.

Tunah chuan Germany kawr hain Muller-a fiamthu thawh lai emaw a goal khung lawm lai emaw hmuh tur a awm dawn tawh lo a, amaherawhchu footballer danglam tak hian football ngainatu ṭhahnem takte thinlung erawh a hneh reng tawh ang.