SYS an zuai ṭan em?

LZ Juice MPL11-ah Lunglei club SYS FC-in hneh loh an la tawng lo a, mahse match hnuhnung berah FC Bethlehem nen an inhnehtawk. Coach Lalmuankima hote hi FCB an hmachhawn ṭum hian match hmasa lam aiin an tlahniam hret.

Vawiin tlai dar 3:30 hian SYS hian Ramhlun Athletic an hmachhawn a, an nihna dik tak a lang thei ang. SYS hian match li aṭangin point riat an hmu a, beisei phak bakin bul an ṭan ṭha. Semifinal beisei ngam tur chuan Ramhlun lakah point thum hlawh chhuah a ngai a, a awlsam dawn lo.

Ramhlun Athletic hi semifinal beisei ngam tho an ni. Danny Lalduhawma hote hian tlarhma an nei ṭha a, an striker Felix Lalruatsanga'n goal nga khung tawhin top scorer a ni mek. Felix hi R. Lalchhantluanga, Lalawmpuia Hnamte leh Richard Lalramnunpuia ten an thlawp ṭha a, an goal bawh a na.

Mahse, Ramhlun tlarhnung hi a phui lo a, match tinah goal hnih emaw aia tam an la chhuah vek a, goal 11 ngawt an chhuah tawh. Danny hote hi an tlarhnung a phui loh avangin SYS tlarhmaa awm Ricky H. Vanlalhriatsanga, Lalruatsanga leh Andreas Lalhmingmuana te an lansarh theih a rinawm.