Zaninah Paris Olympic 2024 an hawng dawn!

Infiamna khawmpui lian - Paris Olympic 2024 chu zanin hian an hawng dawn, zan dar 11:00 aṭangin an ṭan ang a, a hawnna hun hian darkar thum chhung a awh ang. India aṭang chuan Sports18 leh JioCinema app hmanga en theih a ni ang.

Olympic dangah chuan a hawnna hi stadium chhungah ropui taka hman a ni ṭhin, kuminah erawh a ni dawn lo! Paris khawpuia kawtthler pakhat Gardens of the Trocadero-ah neih a ni dawn, stadium ni loa Olympic hawnna hun an hman vawi khatna a ni dawn.

Kawtthlerah hian hmun awl zau tak tak a awm a, hengte hi tui hmangin mawi tak tak taka chei a ni. A kiang maiah France ram rohlu leh khawvel ang pawha ngaihhlut hlawh Eiffel Tower a awm bawk - engtiang takin nge hun an hman dawn tih chu khawvelin a hmu châk.

Gardens of the Trocadero hi kum 1878 aṭanga an siam tawh kha niin, tuna a awm dan phung erawh kum 1937 lai vela an siam kha niin, 93,930m tehmeuh a zau a nih avangin mipui pawh an pungkhawm tam thei dawn tih a chiang.

Lui a awm avangin infiammi 10,500 te chu lawng (boat) 100 hmanga phurh an ni dawn a, stadium nena khaikhin chuan mihring kal thei zat an tam dawn em avangin Olympic hawnna hun a hmuna chhimtu an tam ber ṭum ni tura ngaih a ni.

Infiamna khawmpui lian ni mah se, a hawnna hunah hian khawvel huap zaithiam an zai ṭhin. Paris Olympic hawnna hunah hian zai thiam chuai thei lo Celine Dion (kum 56) leh Lady Gaga te an zai dawn a, tualchhung mi Aya Nakamura a inlan bawk ang.

International Olympic Committee (IOC) president Thomas Bach chuan, "Infiamna khawmpui lian hmu chhuaktu Pierre de Coubertin khan, infiamna hmanga khawvel remna leh muanna siam kha a duh ṭhin - Paris Games kan neih tur thleng hian a duh dan hi kan la zawm reng dawn a ni.

"Olympic a nih chuan ram leh ram inhmelmakna leh inrem lohna kha a awm ve tur a ni lo, khelmual chhungah thianghlim takin kan inel tur zawk a ni ang. Inel ni mah ila in chhung pakhatah kan mu ho ang a, ei leh in pawh a inang tlang kan ei ang.

"IOC hruaitute chauh ni loin, infiammi zawng zawngte pawhin medal lak mai bakah remna leh muanna an ngaipawimawh tur a ni a, chumi tur chuan kan inchah bawk," tiin a sawi a, Olympic chuan remna leh muanna thlen se a duh takzet a ni.