Medal pathumna beiseitu Sindhu

Indian infiammi zingah Olympic medal vawi thum la thei hi an la awm ngai lo, thil theih loh ang maia harsa a ni - PV Sindhu chuan he record duhawm lo tak awm hi thai chhiat theihna remchang a nei dawn.

Rio Games leh Tokyo Games an neih ṭum khan Sindhu hian India tan silver leh bronze medal a lo vaw chhuak tawh a, tun ṭumah hian hmeichhe badminton huangah India aiawhtu a ni leh dawn a, medal lak ngei pawh a inbeisei ngam.

Kum 29 mi Sindhu chuan, "Olympic ka khelh apiang hi ka tan chuan a thar a ni zel, chuvangin tun ṭumah pawh hian tun hma lama medal lak ka chak dan ang bawk kha ka la chak, a vawi thum nan medal lak ngei pawh ka tum ang.

"Hmun sang leh hniam deuha inkhelh hi a boruak a danglam ṭhin - Paris khawpui boruak mil turin training pawh ka nei a, chutihrualin duhthusam ang thlapa tam hun neih erawh a harsa ve deuh," a ti.

India nula hian German rama khawpui pakhat Saarbrucken-a awm Sportcampus Saar-ah training a nei a, he hmun hi French khawpui Paris nen a boruak awm dan leh san zawng te a thuhmun deuh a, hei hian inkhelh kawngah a puih ngei an beisei.

Sindhu chuan, "Olympic vawi hnih ka hmachhawn tawh kha a boruak a inang lo hle, pakhat zawkah chuan mawhphurhna sang lo leh nuamti takin ka khel a, min ṭantu an tamin boruak kha a zangkai takzet.

"Olympic pakhat zawkah erawh mawhphurhna a sang em em thung a, a boruak kha a inang lo. Tawnhriat pahnih ka neih tawh aṭangin Olympic medal ṭha ber chu India tan hlawh chhuah ka tum ang," tiin a sawi.

Olympic hawnna hunah Sindhu hian India hnam puanzar a keng dawn a, ani leh Table Tennis player Achanta Sharath Kamal ten flag hi an keng dawn a ni.