Neeraj Chopra leh beiseina

India ramah hian mihring tam em em awm mah se infiamna khawvelah chuan a dinhmun a sang ngai lo. Neeraj Chopra a rawn lan hnuah Olympic hmelhmang a ti danglam hret a, ani hi Indian infiammi zingah track-and-field huanga gold medal la thei hmasa ber a ni.

Tokyo Games 2020 an neih ṭum khan Neeraj Chopra hian mipa fei khawh huangah 87.58m a thui khawh in pakhatna a ni a, Indian infiammi zingah chuan shooter Abhinav Bindra hnuah mimala Olympic gold medal la thei hmasa ber a ni hial.

Tunah chuan Neeraj Chopra hi kum 26 mi a ni a, a vanglai a hmang chho mek - Olympic gold medal a lak hnuin World and Diamond League champion a nih bakah Asian Games gold medal a la bawk, inrintawkna sang tak nen Paris a pan.

Neeraj-a thil tih khan Indian infiammite zingah nasa takin thu a sawi, tun hma lama tih theih loh anga an ngaih kha a takin a tih theih tih an hre tawh. Hei vang hian Paris Olympic 2024-ah India hian mimala gold medal la thei hmel thar hmuh a inbeisei a ni.