Buaina karah Argentina chak lo

Paris Olympic chu a hawnna hman a nih hmain mipa football chu khelh ṭan a ni tawh - Agentina chuan an match hmasa berah Morocco chu 2-1 in an hneh lo.

Nilaini zan group B inkhelah Morocco lamin goal hnih an khung hmasa, a hnuah Argentina lamin sut zoah an inngai - mahse Cristian Medina goal khung chu VAR hman a nih hnuah an hnawlsak a, a chak lo zawkah an ṭang.

Stade Geoffroy-Guichard, Saint Etienne-a inkhelah hian buaina a chhuak, inkhel entu lamin buaina an siam a, khelmual chhungah thil hrang hrang an vawm luh avangin darkar hnih chuang inkhel tih tawp lailawk a ni. Stadium chhunga inkhel entute chhuahtir an ni a, a hnuah entu awm loin inkhel hi an zo.

Argentina lamin goal hnihna an khung chiah hian Morocco ṭan tute lamin khelmualah thil an vawm lut nasa a, khelmual chhungah mihring an tlan lut bawk, venghimtu lamin theihtawp chhuah mah se a tawp mai theih loh avangin inkhel tih tawp lailawk a ni.

Thuneitu lamin fans an chhuahtir a, chumi hnuah player te inkhel turin an inbuatsaih chhunzawm, taksa an sawizawi hnuah an khelh hmabak minute thum la awm chu entu awm loin an khel zo ta a ni.

Argentina hi group B-ah Morocco, Iraq leh Ukraine te nen an awmkhawm a, an inkhelh kual vek hnuah a sang pahnih ten knockout stage an lut ang.