Goal khung tura piang Haaland

Borussia Dortmund chuan Inrinni zan khan Augsburg 5-3 in an lehthal a, euro maktaduai 20 (£17.1m) man Erling Braut Haaland-a'n hattrick a siam nghal. Manchester United lak theih loh Haaland-a'n a theihna a pholang a, kum 19 mi striker hi Europe club lian zawkin lakchhuah an tum hunah chuan a man hi a let fein a pung thei ang.

Bundesliga inkhel dangah RB Leipzig-in Union Berlin 3-1 in an hneh a, hmahruaitu dinhmun an sawhnghet zel. Borussia M'gladbach erawhin Schalke 2-0 a an hneh loh avangin pahnihna aṭanga tla hniam thei dinhmunah an ding.

Borussia Dortmund-in bul an ṭan chhe lo a, amaherawhchu captain Marcos Reus finishing tawih tawk loh avangin first half-ah an talbuai. Augsburg forward Florian Niederlechner-a goal khung VAR hmanga an pawm loh hnuah German forward hian minute 34-naah goal hmahruai a khung. Second half ṭan chiahah Marco Richter-a'n goal ropui a khung a, Augsburg an phur thar hle.

Minute 49-naah Julian Brandt-a'n goal khungin Dortmund beiseina a siam a, amaherawhchu Niederlechner-a'n first half-a a thun dan ang chiahin minute 55-naah a thun belh. Mualneitu Augsburg-in 3-1 in hma an hruai a, Dortmund dinhmun a chhe ta hle.

Thawnthu ziaktu thiam tak kut hnu ang maiin thil a thleng, Dortmund talbuai lai hian goal khung tura lakluh Haaland chu bench-ah a la awm. Minute 56-naah Norwegian striker chuan defender Lukasz Piszczek a rawn thlak a, minute 23 hnuah Dortmund-in 5-3 a hma an hruai tawh avangin Haaland-a hnathawh a ropui takzet.

Minute 59-naah Haaland-a'n goal zawna a pet hmasak berah goal a khung nghal a, Jadon Sancho siamsak a ni. English winger hian first half-a a chance hlah ho tak thup nan minute 61-naah ṭha zetin a khung a, 3-3 a nih tak avangin Dortmund dinhmun a ṭha ta zawk. Norwegian striker Haaland hian goal zawnah vawi hnih dang pet lehin minute 70-na leh 79-naah goal a khung a, Dortmund tana a match hmasa berah hattrick a siam. 

Bundesliga-a goal khungtu ropui zinga mi Pierre-Emerick Aubameyang chuan Dortmund tana a inlan hmasak berah goal a khung a, Haaland nen an hattrick siam danah inang a tam hle. Player pahnih hian Augsburg lakah bul an ṭan ve ve a, jersey number 17 ha ve vein hattrick siamna goal hi minute 79-naah ve ve an khung.

Gabon striker Aubameyang hian Arsenal a zawm hmain Dortmund tan match 213-ah goal 141 a khung a, Haaland chungah pawh beiseina a sang zui khawp ang.

Hattrick siamtu Haaland chuan, "A chhan tak chu ka sawi thei lo a, amaherawhchu khelmual chhungah khan ka hahdam hle. Club ṭha takah khelhpui ṭha tak ka nei a, he club-ah goal khung turin ka rawn kal a, ka bul ṭan danah ka lawm takzet," tiin goal khung tura German club zawm a nih thu a sawi.

Dortmund manager Lucien Favre chuan, "Haaland khan a chakna a pholang nghal a, awmna hmun tur takah a awm zel avangin khelh dan thar kan neih phah a ni," tiin Norwegian striker hmanga an khelh dan an thlak thu a sawi. Haaland-a ropui zanah hian kum 17 mi Gio Reyna pawh bench aṭanga luhtir a ni bawk.