UCL-a goal khung tam ber Lewandowski
Tun season Champions League-ah Bayern Munich striker Robert Lewandowski-a'n goal 15 a khung a, amah hnaih bertu Borussia Dortmund striker Erling Braut Haaland aiin goal ngain a khung tam. Polish striker Lewandowski hian 2013-14 season-a Cristiano Ronaldo record goal 17 chu goal hnih chauhin a phak lo.
Europe-a football inelna sang berah hian Ronaldo leh Lionel Messi te an langsar ṭhin hle. 2006/07 season khan Kaka-a'n goal 10 khungin top scorer a ni a, hemi hnua goal khung tam berah Ronaldo leh Messi te hming lan lohna hmasa ber chu tun ṭum hi a ni.
Lewy hun
Robert Lewandowski hi kum 32 mi a ni tawh a, hun rei tak khawvela striker ṭha ber zingah chhal a ni tawh. Chutihrualin tun hmain UCL-ah top scorer a ni ngai lo. Polish striker hian 2012-13 season khan Borussia Dortmund final thlenpuiin final-ah tuna a khelhna Bayern Munich an hneh lo. Hemi ṭum hian Lewy hian goal 10 a khung a, goal 12 khungtu Ronaldo a tluk lo.
Tun season-ah erawh Robert Lewandowski elpha reng an awm lo a, UCL match hmasa pangaah goal a khung nghal vek. Group stage-a Red Star Belgrade nen an inkhelh ṭumin minute 16 chhungin goal li a khung a, UCL record a ni. Lewy hian group match hnuhnung bera Tottenham Hotspur an khelh ṭum leh final-a PSG an hneh ṭum tih loah chuan goal a khung vek. Polish striker hian goal 15 khung nan match 10 chiah a mamawh a, top scorer a ni chiang hle.
Kumin UCL-ah Covid-19 vangin quarterfinal leh semifinal second leg an khel thei lo a, Lewandowski tan vanduaina a tih theih a, coronavirus-in Ronaldo record a venghim tih pawhin a sawi theih.
Treble top scorer
Lewandowski hian tun season inelna hrang hrangah goal 55 a khung a, season khata a khung tam ber ṭum a ni. Bayern Munich striker hian Bundesliga match 31 a khelh ṭangin goal 34 a khung a, DFB Pokal match nga aṭangin goal ruk a khung bawk. Polish striker hi UCL, Bundesliga leh DFB Pokal-ah top scorer a ni vek.
Europe Golden Boot dawng tur pawhin Lewandowski hi rinawm viau mah se Ciro Immobile-a'n goal 36 a khung tak avangin a tluk ta lo. Lazio forward vanneihna erawh Serie A-ah match 38 a awm a, Bundesliga-ah match 34 chauh a awm thung. Kum 32 mi Lewy erawhin a match khelh zat aia tam goal a khung a, hemi a nih avangin tun season-a striker che ṭha bera chhal theih a ni.
Bayern Munich striker hi Ballon d'Or dawng tur pawhin beiseiawm ber ni mah se Covid-19 vangin France Football-in chawimawina an sem dawn lo. Lewandowksi hian Bayern Munich chu inelna lian pathum UCL, Bundesliga leh DFB Pokal-ah champion pui mah se Polish striker ṭha mi hian a phu ang tawk chawimawina a dawng lo.
Champions League-a top scorer ni tawhte
Season Top Scorer Club Goals
2019/20 Robert Lewandowski Bayern 15
2018/19 Lionel Messi Barcelona 12
2017/18 Cristiano Ronaldo Real Madrid 15
2016/17 Cristiano Ronaldo Real Madrid 12
2015/16 Cristiano Ronaldo Real Madrid 16
2014/15 Lionel Messi Barcelona 10
Neymar Barcelona
Cristiano Ronaldo Real Madrid
2013/14 Cristiano Ronaldo Real Madrid 17
2012/13 Cristiano Ronaldo Real Madrid 12
2011/12 Lionel Messi Barcelona 14
2010/11 Lionel Messi Barcelona 12
2009/10 Lionel Messi Barcelona 8
2008/09 Lionel Messi Barcelona 9
2007/08 Cristiano Ronaldo Man United 8
2006/07 Kaká AC Milan 10
2005/06 Andriy Shevchenko AC Milan 9
2004/05 Ruud van Nistelrooy Man United 8
2003/04 Fernando Morientes Monaco 9
2002/03 Ruud van Nistelrooy Man United 12
2001/02 Ruud van Nistelrooy Man United 10
2000/01 Raúl González Real Madrid 7
1999/00 Mário Jardel Porto 10
Rivaldo Barcelona
Raúl González Real Madrid
1998/99 Andriy Shevchenko Dynamo Kiev 8
Dwight Yorke Man United
1997/98 Alessandro Del Piero Juventus 10
1996/97 Milinko Pantić Atlético Madrid 5
1995/96 Jari Litmanen Ajax 9
1994/95 George Weah PSG 7
1993/94 Hristo Stoichkov Barcelona 5
1992/93 Franck Sauzée Marseille 5