Number 1 Sinner a inhnukdawk

Mipa tennis world number 1 Jannik Sinner chu Paris Olympic aṭangin a inhnukdawk - Italian tlangval hi inlan tura tih ni tawh mah se a tonsil vangin a inkhel thei dawn lo a, hun tepter tawh takah a inlan theih loh tur thu hi a puang a ni.

Wimbledon khelh lai khan Sinner hi a damlo tawh a, quarterfinal-a Daniil Medvedev a hneh loh ṭum pawh khan 100% fit chu a ni chiah lo a, a ṭhat dan berin a khel chhuak lo - Paris Olympic atan a inpeih hman beisei mah se a dam hman ta lo.

Kum 22 mi Sinner chuan, "Chawlh kar khat chhung chu clay court-ah ṭha takin training ka nei thei a, mahse a hnu lamah harsatna ka nei. In lamah ka inenkawl a, doctor ka rawn hnuah ani chuan inkhel rih lo turin min ti.

"Theih ni se la chuan Italy tana Paris Olympic khelh kha ka chak takzet a, mahni ram tana medal lak kha thil chakawm berte zinga mi a ni, mahse mihring thil tum leh duh ang vekin awm theih a ni bik lo," tiin a sawi.

Paris Olympic 2024 neih turah hian July 27 aṭanga August 4 chhungin tennis inelna bik an nei dawn a, singles bakah doubles hmangin inelna an nei ang a, khawvel player ṭha rual dangte chu an inlan ang.