Al Ittihad-ah Diaby a chiang ta

Aston Villa forward Moussa Diaby chuan Saudi Pro League club Al-Ittihad a zawm chiang ta a, a man zat hi pound maktaduai 50 bawr vel nia tarlan a ni a, kum nga chhung atan contract a ziak.

French winger hian season hmasa khan Villa player man to ber ni turin Villa Park hi £51.9mtd-in a zawm a, a man to mah se, a khel ṭha nghal a, match 54-ah goal 10 khungin, assist vawi kua a nei thei.

Villa chanchina a vawi khat nan Champions League khel turin a hruai kai a, mahse, coach Unai Emery-a'n Jaden Philogene a neih tawh avangin Diaby hi man to zawka hralhchhuah hi a pawi ti lo.

Kum 22 mi Philogene hi Villa player hlui niin, Hull City aṭangin Villa Park hi £13.5mtd-in a pan a, Diaby hmun ruak hnawh khat thei turin an beisei.

Season hmasaa Al Nassr sawmna hnara Villa pantu Diaby chuan, "Villans, engkim avangin inchungah ka lawm a, tunah chuan mangṭha, tia inthlah a ṭul ta. Club leh team tan ka theihna zawng zawng ka hlan a, ka hriatrengnaa cham reng tawh tur sulhnu tam tak kan nei a ni.

"Season duhawm tak, lawm leh hlimnaa khat kan tawng a ni," a ti a, kum 25 mi forward hian chona thar hmachhawn turin Saudi a pan - Al Ittihad-ah hian kar khatah £250,000 vel a hlawh dawn niin an sawi a, kum nga chhungin £85mtd a hlawh phak dawn.

French coach Laurent Blanc enkawlna hnuaia khel tur Al Ittihad hian player langsar tak tak an kawl nual. France striker ropui Karim Benzema chu captain niin, midfielder N'Golo Kante, Liverpool player hlui Fabinho, Real Betis centre back hlui Luiz Felipe, AS Roma aṭanga lakluh Houssem Aouar leh Portuguese forward Jota te an nei.

Hetihlai hian Villa erawh tun nipuia player langsar pahnih an hralhna chiah a ni a, Diaby hma hian defensive midfielder ṭha Douglas Luiz chu Juventus hnenah £42.35mtd-in an hralh tawh.

Anni pahnih bakah hian kum 18 mi attacking midfielder Omari Kellyman chuan £19mtd-in Chelsea a zawm a, Tim Iroegbunam chu Everton hnenah £9mtd-a hralhin, midfielder Morgan Sanson, defender Sebastian Revan leh goalkeeper Viljami Sinisalo te pawh an chhuak a, Philippe Coutinho, Tommi O'Reilly leh Filip Marschall te chu loan-in an chhuahtir bawk.

Hetihrual hian Villa hi an awm mai mai lo. Atletico Madrid forward João Félix an beisei mek nia sawi a ni a, player pariat an la lut tawh bawk. Chelsea aṭangin Ian Maatsen chu £35mtd-in an la a, ani hi season hman zawh takah khan Borussia Dortmund-ah loan-a khelin, Champions League final luh nana player pawimawh a ni.

Juventus aṭanga Samuel Iling-Junior leh Enzo Barrenechea te lak nan £18.6mtd an seng a, Hull City winger Jaden Philogene (£18mtd), Luton Town midfielder Ross Barkley (£5mtd), Everton aṭangin Amadou Onana (£50mtd) leh Lewis Dobbin (£9mtd) te lakluh nan an inseng nual a, Sheffield United forward Cameron Archer an la bawk - ani hi a man zat tarlan a ni lo thung.