Chelsea an inzir leh dawn!

Mauricio Pochettino hnuaia khelh dan an man chho ṭan chiah a, an ban leh ta si - tun season pawh inzir chungin Chelsea hian an hmang leh dawn niin a lang tlat.

Blues hian nimin khan pre-season match-ah Wrexham chu 2-2 in an inhnehtawkpui a,Christopher Nkunku hmangin goal hmahruai khung mah se, League One club hian Luke Bolton leh Jack Marriott hmangin an chhanglet a, a tawpah Lesley Ugochukwu hmangin Blues zawk hian si phurh an sut hram.

Coach thar Enzo Maresca hnuaia an match hmasa berah Blues an chak zo lo a, an goal chhuah pahnih hi tihsual vanga lut ve ve an ni bawk - Maresca chuan Blues ṭantute chu dawhthei turin a ti a, kum khat chu dawhtheih an zir leh dawn a ni mai thei!

Leicester City boss hlui chuan, "Tlarhnung aṭanga game siam kan tum a, hetiang system-ah chuan goal chhuah huama 'risk' lak a ngai miau si a ni," a ti a, a khelh dan phung thlak danglam a tum loh thu a sawi bawk.

Kum 44 mi coach chuan, "Ka system ka thlak dawn lo - inkhelah chuan goal chhuah chang a awm lo thei lo a, a ken tel ve reng a ni. Tlarhnung aṭanga game siam tumte hian goal kan chhuah fo a, mahse, kan chhuah aia tam kan khung ṭhin," a ti - tun ṭumah erawh a ni lo.

Maresca chuan sawi zawmin, "Hmasawnna tur tam tak a awm tih ka pha lo a, mahse, kar hnih chiah kan la training ho tih min hriat telsak a ṭul. Zanin hi kan khelh dan enchhinna hun a ni a, kan nihdan phung tur hlimthla ka hmuin ka hria," a ti.

Chelsea first half XI: Robert Sanchez; Reece James (C), Tosin Adarabioyo, Benoit Badiashile, Levi Colwill; Romeo Lavia, Carney Chukwuemeka, Christopher Nkunku; Noni Madueke, Marc Guiu, Tyrique George

Chelsea second half XI: Lucas Bergstrom; Malo Gusto, Josh Acheampong, Wesley Fofana, Ben Chilwell; Andrey Santos, Lesley Ugochukwu, Carney Chukwuemeka; Angelo, Armando Broja, Raheem Sterling