Atletico-in Griezmann chelh dawn lo

Spanish club Atletico Madrid chuan Antoine Griezmann hnenah contract thar zawrh an tum lo a, France forward hian Spanish club-ah hian kum 2026 thleng contract a nei mek - Madrid khaw club hian hei bak chelh an tum lo a, hralh pawh an pawi ti lo mai thei!

Kum 33 mi forward hian Atletico tan inelna hrang hrangah match 389 khelin goal 181 a khung tawh a, assist vawi 84 a nei bawk. Europa League, Supercopa de Espana leh UEFA Super Cup-ah te nomawi a chawipui a, mahse, a contract a hman zawh meuh chuan kum 35 a ni tawh dawn.

Griezmann hian a hma hun chungchang hi tun hma pawha lo sawi lang tawhin, "Saudi Arabia-ah sum a tam em em a, player kalte pawh ka hrethiam. Kei pawhin chhungkua ka nei a, fa pathum ka neih avangin thutlukna siam awlsam a ni lo ang. MLS-a kal erawh ka la duh ber," a ti.

Barcelona forward hlui hian Atletico chu Europe-a a club hnuhnung ber tur a nih thu a lo sawi tawh a, chuti a nih chuan MLS pannna chance a sang hle. Spanish club hian hlawh atana sum sen tam tak chu tihhniam an tum nia sawi a ni bawk a, Griezmann hi hlawh hnem pawl niin, kar khatah £230,000 a hlawh mek niin an sawi.