Kubo hi chelh kan duh - Sociedad President

Liverpool nena sawizawm hlawh mek, Real Sociedad winger Takefusa Kubo chu a club khelh mekna president Jokin Aperribay chuan an hnena a cham chhunzawm zel a beisei thu a sawi a, Liverpool aṭanga dawrna an la dawn loh thu a sawi bawk.

Japan international Kubo hian season hman zawh takah khan Sociedad tan match 41 khelin goal sarih a khung a, assist vawi nga a nei. Reds-in an duh nia sawi a ni a, mahse, Real Sociedad President chuan, "Eng club mahin min la dawr lo. Chutihrual chuan transfer bazar lai a ni a, eng pawh thleng thei a ni.

"Mahse, Take hi kan bulah a hlim hle a, a chhunzawm zel bawk ang. Kan ngainain kan hmangaih a, La Real-ah kumkhuaa a cham beisei phawt ang," a ti a, dawrna an dawn loh thu a sawi rualin kawng erawh a khar tawp lo.

Liverpool hi an coach ngainat rawn Jurgen Klopp chuan chhuahsanin, coach thar Arne Slot kaihhruaina hnuaiah season thar an hmachhawn dawn - he thu buatsaih a nih thleng hian nipui transfer-a player thar lakluh an la nei rih lo a ni.