North London derby khelh zanah Stevie G Merseyside derby hnuhnung ber

Vawiin hi England-ah derby ropui pahnih khelh ni a ni. India sanaa tai dar 6:15-ah Tottenham Hotspur khelmualah Arsenal an lêng lut dawn a; zan dar 11:00-ah Everton khelmualah Liverpool an kal dawn a, Steven Gerrard an hruai tel hnuhnung ber a ni tawh ang.

Premier League-a derby hmingthang pahnih khelh niah tho hian hmahruaitu Chelsea chu Villa Park-ah an kal ang a; champion lai Manchester City khelmualah Hull City an kal ang.

London hmar veng

London hmar lama club inhal tak pahnih Arsenal leh Tottenham Hotspur-te hi inṭhen­awm hnai tak an ni. November 19, 1887 khan an lo inkhel daih tawh a; 1992-a Premier League ṭan a nih hnuah vawi 44 inkhel tawhin Arsenal hi vawi 18 an chak a, Spurs lam vawi riat chiah an la chak.

Premier League fixture-a goal luh tamna ber a ni a, vawi 44 an inkhelhah goal 126 a lut tawh a, hei hian inkhel hmuhnawm a nih ṭhinzia a tilang chiang ber awm e. Arsenal ṭantu 'Gooners' leh Spurs ṭantu 'Yids' te hi tun hnaiah chuan a insual buai zawngin an khawsa tawh lo a; nimahsela a huatin an inhua a ni ber a, chuvangin North London derby-a chak pawh fans-in an lawm 'over' ṭhin a, chak loh an tuar na hle bawk a ni.

Team intluk pahnih

Tun hnaia team che ṭha pahnihte hi champion tura rin ngam an ni tawh lo a, Champions League erawh khelh ngei an tum. Pangana Arsenal hian point 42 an hmu a, parukna Tottenham hian point 40 an hmu mek - pathumna Manchester United-in point 43 chiah an la hmuh avangin Champions League khelh ngei tum ve ve an ni.

Arsenal hi tun hnaiah a zawnin inkhel vawi ngaah an chak tawh a, he team hi khual-muala Manchester City hneh theitu an ni tih theihnghilh suh. Spurs hi White Hart Lane hmang thiam team an ni a, 5-3 a Chelsea hnehtu an ni tih hre reng la, Emirates Stadium-ah 1-1 in an inhnehtawk tih pawh i hriat tel a ṭha ang.

Tottenham boss Mauricio Pochettino hian goal 20 khung tawh Harry Kane a nei a, inkhel pawimawhah a hun taka che ṭha ṭhin midfielder Christian Eriksen a kawl bawk a, a player pawimawh dang chu goalkeeper Hugo Lloris a ni.

Arsenal thiampuipa chu Alexis Sanchez a la inhliam a, Mikel Arteta leh Oxlade-Chamberlain pawh an la dam hman lo a; nimahsela Danny Welbeck an chhawr thei tawh a, Mesut Ozil pawh a fit tawh e.

Liverpool khaw club

1893-a inkhel ṭan tawh Everton leh Liverpool-te hi Liverpool khaw club ve ve an ni a, team inel tak ni mah se a boruak chhe zawnga team inhal an ni lem lo. Chhungkhaw khata mi pawh Liverpool ṭan an awm a, Everton ṭan an awm leh bawk a; fans pawh a hranpaa awmna hmun (geographical area) bik nei an ni lo a, politics emaw, an hnathawh zawnga inṭhenna tun hnaiah chuan a awm lem lo.

1962–63 season aṭang khan club pahnihte hi English top flight-ah an la awm ngar ngar a, chuvangin England-a top flight derby a zawna khelh rei ber a ni. Premier League ṭan a nih hnua red card tamna ber inkhel a ni a, vawi 20 ngawt mai red car phawrh a ni tawh - Gerrard hi ṭum hnih hnawhchhuah a ni tawh a, Everton captain hlui Phil Nevilla pawh hi ṭum hnih an hnawtchhuak tawh.

Liverpool hi khawpui lian tak a ni lo a, a chhunga chengte hi a pawl leh a senin an inṭhen a, zaninah pawh he khua hi a reh ṭhuap dawn a, khelmuala lut ve lo zawng TV hmaah an ṭhu deuh vek ang!

Club 'thar' pahnih

Season hmasa kha Everton leh Liverpool chet ṭhat ṭum a ni. Tun season erawh club 'thar' ang deuh an ni a, season hmasa an phak lo hle.

Everton hi tlar hnungah an buai a, goal 34 zet an chhuah tawh a, season hmasa tluana an goal chhuah zawng zawng aiin goal nga chiahin a tlem tawh. Liverpool hi tlar hmaah an buai ve thung a, season hmasa khan goal 101 an thun a, tunah hian goal 55 chiah an la khung.

Liverpool boss Brendan Rodgers chuan zaninah Daniel Sturridge a chhawr thei dawn a, August hnua a vawi khatna atan inkhel bul a ṭan hial mai thei - Sturridge hian Inrinni hmasa khan a lo kirna inkhelah West Ham United lamah goal a thun. Sturridge hian Merseyside derby vawi thum khel tawhin goal hnih a thun tawh.

Gerrard-a tan a derby vawi 33-na leh a tawpna tur a nih hmel a; Everton lakluh thar Aaaron Lennon tan erawh derby hmasa ber a ni ve thung ang. Liverpool hi game hnuhnung paruka vawi nga chak thei an ni a, Everton erawh Crystal Palace an hneh hlauh kha tun hnai inkhel pasa­riha an chak awm chhun a ni.