Milan sawiseltu Torres

Fernando Torres chuan thutiam ti hlawhtling loa puhin AC Milan a sawisel.

Spanish striker Torres chuan , "An thutiamah an dingnghet lo a ni. Kan inbiak tirha kan inrem dan ang khan an awm lo hrim hrim a, ka beisei angin khelhna hmun ka chang lo. Vawiinah ka inkhela, a tukah ka awl leh a, khelh dan mumal lo lutuka inkhelh reng kha a ninawm em em a ni," tiin Milan-a an chhawr dan chu a lungawi loh thu a sawi.

Torres hian season ṭan dawn khan Chelsea aṭangin AC Milan hi loan-in a zawm a; January thla khan a nghetin Italian club-ah hian contract a ziak. Milan-in contract nghet an ziahpuina chhan hi Atletico Madrid aṭanga Alessio Cerci an lak duh vang a ni.

Milan-in an duhthusam ang ngeiin Cerci an la lut a, Torres-a'n a club hlui Atletico Madrid a zawm. Liverpool forward hlui hian Atletico tan vawi sarih inlan tawhin goal thum a khung der tawh a ni.