African Cup Final-ah Ghana Vrs Ivory Coast
Pathianni zan dar 12:30 hian Africa Cup of Nation final-ah Ivory Coast leh Ghana te Bata-ah an inhmachhawn dawn. Final hi Sony Six-ah LIVE-a pekchhuah a ni ang.
Buaina karah Ghana
Ghana hian final thleng turin semifinal-ah a thlengtu Equatorial Guinea 3-0 in an hneh a, inkhelh laia buaina a chhuah avangin minute 30 chhung chawlh a ni.
Ghana hian an player pawimawh Asamoah Gyan chhawr thei lo mah se bul an ṭan ṭha a, inkhel an thunun tel bawk.
Minute 42-naah Ghana striker Kwesi Appiah-a'n Guinea keeper Felipe Ovono laka a penalty hlawhchhuah chu Ligue 1 club Lorient player Jordan Pierre Ayew-a'n goal-ah a chantir a, minute thum hnuah Wakaso Mubarak-a'n counter attack aṭangin a khung leh bawk. Ghana-in chawlhlawk laiin sihnih faiin hma an hruai.
Second half-ah Guinea-in an si phurh sut ngei tumin thapui thawh mah se Ghana tlarhnung an su hawng zo lo. Ghana lamin Andre Ayew-a hmangin minute 75-naah goal an khung leh a, 3-0 in an chak.
Buaina chu
Chak lo lam fan-ten buaina an chawkchhuak a, khelmual chhungah bottle leh chair-te an vawm luh avangin chawlhlawk laia Ghana player-te chhuak tur chu venna pek an ngai hial. Huntawp hmain buaina lian zawk chhuak a, darkar chanve chhung chawlh a ni a, buaina chhuak ti tawp turin Police-te'n helicopter aṭangin tear gas an thlak hial. Buaina reh hnuah inkhel hi an zo thei hram.
Final thlirlawkna
1992 Africa Cup of Nations final-ah Ivory Coast hian penalty shootout hmangin Ghana a hneh a, an champion. Hemi hnu hian Ivory Coast hi African Cup-ah an champion leh tawh lo.
Ghana hi Group C-ah Algeria, Senegal leh South Africa te nen an awm ho a, Algeria nen point ruk ve ve hmuin knockout stage an lut. Quarterfinal leh semifinal-ah Guinea leh a thlengtu Equatorial Guinea 3-0 ve ve in an hneh.
Ghana team-ah hian an player pawimawh leh innghahna chu captain Asamoah Gyan a ni a, an captain hi inhliam avangin semi final-ah chhawr thei lo mah se final-ah chuan a khelh theih an beisei a ni.
Ivory Coast hi Group D-ah Guinea, Mali leh Cameroon te nen an awm ho a, point nga hmuin group hmahruaitu an ni. Ivory Coast hian quarter final-ah Algeria 3-1 a an hneh a, semi final-ah DR Congo chu 3-1 a hneh lehin final an inhlangkai a. Player langsar Yaya Toure, Gervinho leh Wilfried Kanon te telna Ivory Coast hi chak zawk tura rin an ni.