Jovetic Out, Bony In

January tranfer-a player manto ber Wilfried Bony-a'n a club thar Manchester City-ah hmuh pawimawh a chang nghal. Ivory Coast forward hi City Champions League squad-ah Stevan Jovetic aia telh a ni.

Champions League-ah foreign player 17 bak squad-ah telh theih a ni lo. Manchester City erawh UEFA financial fair play rules an bawhchhiat avangin an squad-ah foreign player 16 chiah telh phalsak an ni. City tlar hmaah Bony, Sergio Aguero, Edin Dzeko leh Jovetic te an awm bawk si nen Jovetic tan hmun a awm ta lo a ni.

Kum 2013 khan City-in pound maktaduai 22-in Fiorentina aṭangin Jovetic an la lut a, inhliam vangin English club-ah khelhna hmun a chang tam lo. Montenegrin forward hian Manchester City tan goal 11 chauh a la khung a, a chet ṭhat tawk loh avangin a aiah pound maktaduai 25 man Bony an thlang ta zawk.

Manchester City hian Champions League last 16-ah February 24 hian Etihad Stadium-ah Barcelona an mikhual ang. Kar thum hnuah Nou Camp-ah second leg khel turin an lenglut ve leh ang.