Hummels-a'n Dortmund a fuih

Borussia Dortmund captain Mats Hummels chuan zanina Freiburg an khelh hunah a teammate-te chu a hma zawng aia ṭang nasa lehzual turin a fuih.

Hummels chuan, " A sual a kan sual tak meuh meuh a ngai dawn a ni. Kan tana pawimawh ber chu goal khung hmasa zawka ṭan a ni a, goal kan khung hmasak zawk theih chuan ṭha takin kan khel chhunzawm thei ang. Tunah hi chuan goal phur hmasa zawkah kan ṭang zel a, hei hi kan buaina a ni. Game 15 khelh leh tur awmah hian theihtawp kan chhuah a ngai dawn a ni," tiin a sawi.

Tun season-ah Borussia Dortmund hi Bundesliga-ah an che chhe hle a, kum thara match hniha chak an la neih loh avangin table mawngphahah an awm mek. An relegate a nih chuan kum 1971-72 hnua division hniam zawka an tlak lehna hmasa ber tur a ni ang.

Nilaini khan an khelmual Signal Iduna Park-ah player 10-a khel Augsburg 1-0 a an hneh loh avangin an mualpho hle. Inkhelh banah Hummels leh vice-captain Roman Weidenfeller-te chuan an fans thinur hnenah ngaihdam an dil hial a ni.

Zanina an khelhpui tur Freiburg nen hian point hnih chauhin an intlau a, tun hi relegation zone chhuahsan-na hun remchang a ni.