Madrid Derby-ah Ronaldo kir dawn

Zanin dar 8:30 hian Vicente Calderon-ah Atletico Madrid-in an hmelma Real Madrid an mikhual dawn. Team inhal tak an nih avangin an inkhel hi result piah lam thlengin an pawimawh.

Real Madrid-in vawi 21 khelhah point 54 hmuin table hmahruaitu an ni a, Atletico Madrid hi pathumna niin an inkarah point sarih chiah a awm. Madrid khaw club pahnih inkarah Barcelona an awm a, Catalan club hian point 40 an hmu tawh. Champion lai chu pathumnaa awm Atletico Madrid hi an ni.

Real Madrid-in 2014 Champions League no­mawi chawi turin Atletico Madrid an hneh a, Euro­pean champion an ni.

Season tharah Atletico an dang daih, Spanish Super Cup-ah Diego Simeone team-te hian Real Madrid 2-1 (aggregate) in an hneh nghal. La Liga-ah Tiago leh Arda Turan te goal hmangin Atletico 2-1 in an chak leh a, Copa del Rey last 16-ah Atletico hian champion lai Real Madrid hi an pet chhuak leh bawk. Carlo Ancelotti hote hi table-ah sang zawk mah se an pahnih inkara chungnung zawk chu Atletico an ni.

Real Madrid tana thu lawmawm chu match hnih hrem hnua Cristiano Ronaldo kir tur hi a ni. Portugal captain hian La Liga-ah goal 28 a khung tawh a, Atletico tlar hnung tan ven uluk a ṭul khawp ang.

Ronaldo erawhin ṭum dang aiin mawh­phurhna a ngah dawn. Sevilla an hneh ṭumin James Rodriguez leh Serigo Ramos te an inhliam a, Portuguese defender Pepe leh Luka Modric te inhliam vangin an inlan dawn lo bawk.

Marcelo-a'n Sevilla nen an inkhelh ṭum bawk hian tun season-a yellow card vawi ngana a hmu a, Brazilian defender hi Atletico hmachhawn thei lo zingah a tel bawk.

Real boss Carlo Ancelotti chuan tlar hnungah loh theih loin Raphael Varane leh Nacho te a inkawp tir a ṭul dawn a ni.

Italian manager chuan, "Ramos leh Pepe te hi khawvel-a defender ṭha ber te zinga ami an ni a, tel thei dawn lo mah se Varane leh Nacho te hi ka ringtawk hle. Hlauhthawnna ka nei lo," tiin a sawi.

Ancelotti chuan sawi chhunzawmin, "Keini tan chuan inkhel pawimawh tak a ni. Atletico laka kan vanduaina hi tih tawp a ngai a ni. Kan hneh chuan kan inkarah point 10 a awm thei dawn a, chu chuan kan inkhel tur pawimawhna chu a sawi chiangin ka hria," a ti.

Atletico defender Diego Godin chuan, "Chak kan duh, chak hi engtik lai pawhin kan duh reng. Real Madrid phei hi chu hneh kan duh lehzual. Calderon-ah min ṭantute hmaah kan khel dawn a, chak theihna chance ṭha tak kan nei a ni," tiin a sawi.

Uruguay defender chuan sawi zelin, "Player rang tak tak an nei a, counter attack-ah ven uluk an ngai hle. Kan fimkhur a ṭul a, ball kan chanin kan fimkhur lehzual a ngai a ni. Ball min chhuhsak a nih ngat chuan khawvelah anni aia hlauawm an awm lo," tiin a sawi.