United hmachhawn vanga hlawk Cambridge

Cambridge United manager Richard Money chuan FA Cup-a Manchester United ṭum hnih an hmachhawn theih avangin club kal zelna turah sum lama an buai loh tur thu a sawi.

League Two club Cambridge-in FA Cup fourth round-ah United an mikhual a, an khelmual Abbey Stadium-ah goal awm loin an draw.

Thawhlehni zan khan Old Trafford-ah replay khelin 3-0 in chak lo mah se pound maktaduai khat aia tam an hlawh chhuak a, hei hi Cambridge ang club tenau tan chuan sum ṭhahnem tak a ni.

Money chuan, "United kan hmachhawn aṭanga kan pawisa hmuh zarah club sum dinhmun a ngaih­tuah awm lo a, mumal takin club ṭha zawk din turin kan kal zel thei ang," tiin a sawi.

Cambridge hian kum 2005 khan tax an pek theih loh avangin field pawnah harsatna an tawk a, field chhungah result an nei ṭha lo chhunzawm bawk.

Kum hnih chhung kha chu club director-te sum thawhkhawm zarah player-te hlawh an pe thei hram.

Cambridge boss chuan, "Kan pawisa hmuh hian kan squad a tichak thei ang. Amaherawhchu, mawl mang takin kan pawisa hmuh hi hman kan tum lo," tiin a sawi.

Money chuan, "Sea­son tharah ka player-te an chhuah ka ring lo a, chhuak tura an sawi player pahnih khat pawh hi ka be tawh a, Cambridge-ah an hlim thu min hrilh," a ti.