MSL khel tur Tuikual South

Ningani zan khan Zarkawt Recreation Center-ah Tuikual South mipui an lam a, an au rual a, an hlim tel bawk - Mizoram Super League an khelh dawn vang a ni.

Tuikual South-in MSL playoff final-ah Chawnpui VR4 78-68 in an hneh a, MSL khel turin an tling. Tuikual South hian Playoff-ah match ruk khelin an chak fai vek a, an phu ang ngeiin Mizoram basketball inelna ber an khel dawn ta.

Final chu

Tuikual South-in bul an ṭan ṭha a, an chance neih an hlah meuh lo. Chawnpui erawhin final boruak bul an ṭan fuh lo a, Tuikual South-in quarter khatnaah 20-11 in hma an hruai. Quarter khatnaah inthlau deuh mah se final boruak a nep phah lo, mipui thawm a ṭha chhunzawm zel.

Quarter hnihna an khel a, Chawnpui khelah hmasawnna hmuh tur a awm nachungin Tuikual South game a ṭhat chhunzawm zel avangin team pahnih an inthlau tual tual a. Chawnpuiin free throw an thun theih loh an tuar a, halftime-ah 39-25 a ni.

Quarter thumnaah inkhel a nung lehzual a, mipui thawm hriat a nuam a, player chevel a hmuhnawm hle. Chawnpui tan coach leh player ni kawp K. Vanlalruata a ṭangkai a, Lalnunmawia Sailo a hmuhnawm bawk - inkhel pumpuia player pahnih thun zat belhkhawm hi point 36 a tling. Tuikual South game a tlahniam tak tak thei lo - quarter thumnaah pawh hian finalist-te hian point 21 ve ve an khung a. Tuikual tan Rakesh-a'n rebound a lak theih bakah hun pawimawhah a score thei a, C. Malsawmkima 3 point luh a ṭangkai viau bawk.

Quarter li naah Chawnpui an che ṭha zel a, quarter tawp berah 22-18 in hnehna chang mah se result erawh a danglam phah lo. Tuikual South-in an phu ang ngeiin hnehna an chang.

Eng nge an sawi?

Tuikual South coach leh player ni kawp KC Lalliantluanga chuan Vanglaini palai zawhna chhangin, "MSL khel turin kan inbuatsaih nghal char char ang. MSL team naupang ber ni dawn mah ila, kan player-te hi tawnhriat nei ṭha tak tak an nih avangin eng team mah hi kan huphurh bik lo. Veng chhung mipuiin kan rin phak bakin min phur pui a, anni hi kan chakna hnar an ni. Champion sawi nan chuan a la hma hret a, a tawp ber erawh nih kan tum bik lo," tiin an inrintawk thu a sawi.

Tuikual South Captain F.Zodinthara chuan, "Vengchhung mipui an phur tawh a, hei hian min ti phur lehzual. MSL-ah hian team ṭha tak tak vek an nih dawn avangin sawilawk thiam a harsa a, a chhe ber erawh kan nih ka ring bik lo," a ti.

Dina hi Tuikual South in MSL an khelh theihna tura an player ṭangkai a ni a, court chhungah team a kaihruai ṭha hle.

Chawnpui VR4 manager Laltlanmawia chuan, "Kan khel fu lo ve hrim hrim a, kan che hleithei lo chu a ni ber e," tiin chak loh chhuanlam siam a tum lo.

FINAL THLIRNA TAWI

Tuikual South QTR Chawnpui VR4

20 1st 11

19 2nd 14

21 3rd 21

18 4th 22

TUIKUAL SOUTH

Vanchuangpuia Rebounds: 8 Points: 21

Rakesh Rebounds: 15 Points: 19

F.Zodinthara Rebounds: 5 Points: 16

CHAWNPUI VR4

K.Vanlalruata Rebounds: 6 Points 20

Lalnunmawia Sailo Rebounds: 2 Points 16

K.Lalchhuanawma Rebouns: 6 Points 7