Inpeih hman tum Force India

Force India team chuan March 15 aṭanga ṭan tur Formula season tharah inpeih hman ngei an tum.

2015 Formula One Grand Prix hmasa ber hi Australia-ah tlan a ni dawn. Kumina Force India driver tur hi Sergio Perez leh Nico Hulkenberg-te an ni. Season lo awm tur hi season 66-na a ni a, team 11 an inel ang.

F1 season thar atan hian pre-season test chu tunkar khan neih a ni a, he hunah hian Force India team chu an inlan ve thei rih lo. Test hi February 26 leh March 1 inkarah neih leh tur a ni.

Force India team thupuangtu chuan, "Test neih leh hunah chuan kan car hlui nen test kan hmachhawn ve phawt ang a, a leh pekah chuan kan car thar VJM08 hmangin test kan nei theih ka beisei. Season ṭan hma ngeiin kan inpeih ngei ka ring. Australia-ah chuan car thar nen bul kan ṭan thei ang" tiin season thar atana inpeih hman ngei an tum thu a sawi.