Zaninah National Games Semifinal Mizoram vs Maharashtra

National Games-a Mizoram gold medal beiseina chu football inelna a ni. Zanin dar 7:00 hian Corporation Sta­dium, Kerala-ah Mizo­ram leh Maharashtra-te'n semifinal an khel ang.

Semifinal pakhat zawkah Goa hmachhawn tur kan hre hman lo. Group A hmahruaitu Goa hian nizana inkhel Punjab emaw West Bengal emaw an hmachhawn ang.

National Games final hi Thawhṭanni zana khelh tur a ni.

Group hmahruaitu

2014 Santosh Trophy champion Mizoram hi Group B hmahruaitu an ni a, an khingpui tur Maharashtra hi Group A pahnihna an ni.

Mizoram hian Natio­nal Games bul ṭan nan champion lai West Bengal an hneh nghal a, a vawi hnihnaah Punjab an hneh leh bawk. Match hnih khelh zawhah Mizoram hi Group B hmahruaitu an ni chiang tawh.

Nimin zing khan Mizo­ram hi group stage match hnuhnung berah Services nen 2-2 in an inhnehtawk. First half-a Services hmahruaina goal chu penalty aṭanga Rohmingthanga khung hmangin Mizoramin an sût a, he mihma hian Punjab lama goal khungtu MS Dawngliana'n penalty a hlah a, penalty pahnih hi Brandon VL Remdika hlawhchhuah ve ve a ni.

Second half-ah Ser­vices bawkin hma an hruai nawn a, Mizoram­in subsitute Albert Zohming­mawia hmangin an sut a, a siamsaktu hi goal khungtu ang bawka bench aṭanga lut Laldampuia a ni.

A awlsam dawn lo

Mizoram hmachhawn tur Maharashtra hian bul an ṭan fuh lo a, a thlengtu Kerala an hneh lo nghal.

Maharashtra hian match hnihnaah harhthar­na an chang a, Tamilnadu 6-1 ngawta sawptu Goa 5-3 in an hneh. Maharashtra hian group match hnuhnung berah Tamilnadu 2-1 in an hneh a, semifinal an lut.

Group A-ah Goa, Maharashtra leh Kerala te'n point ruk vek an hmu a, goal difference nei chhe ber Kerala an tla.

Mizoram daltu

2013 Santosh Tro­phy qualifier-ah Mizo­ram, Uttarakhand leh Maharashtra group khatah an awm kawp a; Mizoram hian Maha­rashtra an draw vangin final round an lut lo. Maharashtra erawhin semifinal an thleng.

Inhliam vanga buaina

Mizoram-in inhliam vangin MPL2 best player R. Malsawmtluanga, Lalrozama, William Lal­nunfela leh David Lal­thansanga-te an chhawr thei dawn lo a. Services an hmachhawn ṭuma inhliam vanga lakchhuah Zoramthara erawh a dam hman beisei a ni.

Coach thukhawchang

Mizoram coach K. Malsawmkima chuan, "Kan player ṭhenkhat hahchawlhna hun kan pe thei a, a lawmawm khawpin ka hria. Player inhliam ka nei nachungin kan ṭha viau turah chuan ka ngai. Kan khingpui tur Maharashtra khel ka hmu tawh a, an ṭha thawkhat khawp mai. Chutihrualin hneh theih loh tur erawh an ni lo," tiin a sawi.

MPL-a Aizawl FC champion-puitu coach chuan, "Mi­zoram tana gold medal lak ngei hi kan tum ber a ni. Pathian zarah kan chak theih hram ka bei­sei, Mizo mipuite ṭawng­ṭai puina kan ngen tak meuh meuh a ni," a ti.