A vawi hnih nan vawiinah Mizoram Club Vs Meghalaya Club

7th February, 2015

I League Under 19 Northeast Zone chu vawiin hian Lammualah khelh chhunzawm a ni ang a, Mizoram club leh Meghalaya club te bawk an inhmachhawn dawn.

Chawhma dar 11:00-ah Aizawl FC leh Shillong Lajong FC an inkhel ang a, chawhnu dar 2:00-ah Chanmari FC leh Royal Wahingdoh te an inkhel leh ang. Northeast aiawhin team pakhat chiahin final round an lut dawn a, hei vang hian match zawng zawng hi a pawimawh vek.

Aizawl FC vs Shillong Lajong

Shillong Lajong-in Mizo player pathum Lalrammuana, Samuel Lalmuanpuia leh Isaac Vanmalsawma te an nei a, player pawimawh vek an ni. Aizawl FC coach Nicky Malsawmtluanga'n Mizo pathum zingah Isaac-a chu ven uluk a ngaih tur thu Vanglaini palai a hrilh.

Lajong hian an game hmasa berah Chanmari FC lakah inkhel thunun mah se goal an khung theih loh avangin point khat chiah an hlawhchhuak. Chanmari FC tlar hmate'n Shillong club tlar hnunga Mebankhraw Wahland leh Nabin Rabha te inkawp an pal darh zo lo a, Aizawl FC hmaah fiahna vawi hnihna an hmachhawn ang.

Aizawl FC hian midfield-ah Lalṭhathanga leh Lalnuntluanga te nei chungin Royal Wahingdoh lakah inkhel an thunun thei lo a, Lajong an khelh hunah midfield an siksawi hret a rinawm a. Goal khung turin Lalmuanzoa leh Vanlalduatsanga te an pawimawh ang.

Eng nge an sawi?

Aizawl FC coach Nicky Malsawmtluanga chuan, "Lajong khelh dan kan thlir a, chumi mil chuan game plan kan siam a, kan tih fuh ngei ka ring. Shillong tana khel Mizo pathumte hi ka enkawl tawhte an ni a, hma an sawn hret tawh a nih pawhin ka player-te hi ka dah sang zawk. Kan tlar hnung tan dan theih loh tur a awm lo," tiin a sawi.

Shillong Lajong manager Sambha Shallam chuan, "Kan junior player-te hian hmasawnna nei se, senior level-ah ṭha takin khel thei turin inzir chho se tih kan duh dan a ni. Aizawl FC hi kan hneh kan ngei kan tum a, kan chak zo ta lo a nih pawhin kan hnual hran lo," tiin player-te hmasawnna a ngaih pawimawh thu a sawi.

Chanmari FC vs Royal Wahingdoh

Squad aṭanga thlirin Chanmari FC an ṭha a, Mizoram Premier League-a tawnhriat nei an kat nuk mai; amaherawhchu Chanmari FC hi Shillong Lajong hmaah an vul zo lo. An khingpui tur Royal Wahingdoh hian Chanmari ang thoin point thum hlawhchhuak zo lo mah se game ṭha an lantir a, Aizawl FC lakah an ṭha tawk tih an phochhuak.

Lajong ang thoin Wahingdoh-ah Mizo player an pawimawh a; amaherawhchu an Mizo player parukte Aizawl FC laka goal an khung ṭumin an inrawlh lo vek. Game hmasa bera Wahingdoh goal hi Kitboklang Pale freekick aṭanga Mebanshang Suting thun a ni.

Chanmari-in tlar hmaah Lalawmpuia leh Vanlalchhanhima te an nei a, MPL-a Dinthar leh Chanmari hma tawngte hian final round an thlen theih nan goal an sual chhuah a ṭul tawh takzet.

Eng nge an sawi?

Chanmari FC coach Lalsangzuala Hmar chuan, "Ni hnih chhung training-na kan nei a, kan hlawkpui turah ka ngai. Chak kan mamawh a, team chhia an awm loh avangin a awlsam dawn lo. Insawi pawr theih vak pawh a ni lo," tiin a sawi.

Wahingdoh head coach Bobby Nongbet chuan, "Inpuahchahna kan nei ṭha a, Aizawl-ah hlawhchham tumin kan kal lo. Chak ngei turin kan khel ang," tiin final round thlen ngei a tum thu a sawi.

I League U19 Fixtures

February 4, Nilaini

Shillong Lajong 0 - 0 Chanmari FC

Aizawl FC 1 - 1 Royal Wahingdoh

AIZ : Lalṭhathanga 45'

RW : Mebanshang Suting 67'

February 7, Inrinni

11:00 AM Aizawl FC vs Shillong Lajong

02:00 PM Chanmari FC vs Royal Wahingdoh

February 11, Nilaini

11:00 AM Royal Wahingdoh vs Shillong Lajong

02:00 PM Aizawl FC vs Chanmari FC