Koeman-a'n Suarez a mamawh lo tih a hrilh!

Barcelona-in coach thar Ronald Koeman an neih hnuah chanchin thar an neih belh zel a, tun dinhmunah chuan an player lakluh tum lam aiin an chhuahtir tum lamin chanchin an ngah zawk. 

Luis Suarez-a'n Barcelona-in an mamawh lo a nih chuan club thuneitute ngeiin hmaichhana an hrilh a phut thu a sawi tawh a, thuthar berah chuan a duh ang ngeiin coach thar Koeman-a'n Suarez hi a mamawh loh thu phone hmangin a hrilh!

Khawih thiang lo 'Lionel Messi' erawh Barca thuneituten an la infak siak rih mek a, Catalan club thuneituten Argentine forward hi chelh dan hram an la zawng rih - Messi chhehvel ringawt hi thuthar a awm reng dawn. Koeman hian Barca player zingah Arturo Vidal chu a ruahmannaa a tel loh thu a hrilh tawh bawk a, anni bakah hian Ivan Rakitic, Samuel Umtiti leh Junior Firpo chu chhuak chiang tura ngaih an ni. 

Liverpool forward hlui Suarez-a'n ualau takin mamawh a nih loh chuan hmaichhan ngeia hrilh a phut thu a sawi a, a hnu rei loteah Koeman chuan kum ruk chhung Barca striker chhuanvawr ni tawh hi a mamawh loh thu a hrilh. 

Koeman-a'n Suarez a biak thu puangtu hi Catalan radio station RAC1 an ni a, anni hi Koeman leh Messi indawrna thu puangzartu bawk kha an nih avangin an thusawi hi rintlak tura ngaih a ni. 

Dutch coach hian Messi a biak hnuah Arturo Vidal chu a mamawh loh thu a hrilh ni bawkin an sawi a, hriat tel tur chu player pahnih hi kum 33 mi ve ve an ni tawh - Koeman hian player naupang zawk a melh niin a lang. 

Koeman ruahmannaa tel lo zingah Rakitic, Umtiti leh Junior Firpo-te chu player langsar an ni a, mahse a la be lo thung. Sergio Busquets, Sergi Roberto leh Gerard Pique-ten an hma hun tur an la hre thei lo a, anni hian senior team pumpui chu hralh an ni dawnah an ngai a, engmah hrilh an la ni lo bawk. 

Barcelona-a Suarez sulhnu enin zah taka enkawl a phu tih a lang a, Lionel Messi nena an inṭhianṭhatna thlirin Barca-a cham tura ngaih a ni bawk. Mahse, Koeman-a'n Barca coach hna a chelh rualin Suarez-a'n thawm a nei hmasa ber tlat!

Barcelona tan season hman zawh taka Messi dawta goal khung hnem ber chu Suarez a ni a, Uruguayan striker hian inelna hrang hrangah match 36 khelin goal 21 a khung a, assist vawi 12 a nei - goal 33-ah a la inrawlh cheu tihna a ni. Suarez-a record en ila, 'world class' striker huanga dah tam takin season hman zawh takah an la tluk lo tih chiang takin a lang. Mahse, Liverpool striker hlui hian nakkum nipui thleng contract a nei a, 60% match a khelh tlin chuan kum khat dang pawhsei theih a ni bawk. 

Kum 33 mi striker hian Barca-ah hian kar khatah £405,000 a hlawh mek nia sawi a ni a, Messi tih loha Barca-a hlawh hnem ber a ni. Suarez hi chelh ta se, heti zat hlawh player hi 60% match khelh tlin tir loh a harsa dawn a, kum khat contract pek belh hi Barca hian an inhuam bawk si lo niin a lang ber. 

Uruguay tan vawi 113 inlana goal 59 khung thei Suarez hi Barca-in duh lo mah se duhtu a la nei hraw a, a club hlui Ajax an sawi rik hnuah PSG pawh sawi rik an ni ve leh ta.

PSG hian Suarez hi Neymar nena inkawptir leh an châk nia sawi a ni a, Suarez lakluh an tum hi Messi 'hmin' tumna hmanrua a ni ang em? tih thlengin zawhna awm thei a ni. Tuin nge 'MSN' hmuh leh chak lo ang?

French champion hian Suarez hi lakluh an duh tak tak a nih chuan Ajax aiin chance an nei ṭha zawkah ngaih a ni. Dutch club hi Suarez-a'n hming a chher ṭanna tak tak ni mah se Barca-a a hlawh ang zat pe thei tur chu PSG hi an ni. Suarez hian Barcelona-ah substitute player nih pawh a hnial loh thu a sawi tawh a, kum 33 mi striker hian a career tawp lam a hnaih ve tawh tih a inhriat avangin 'sum' a thlir tel tih a lang.

Barca-in Suarez duh lo mah se duhtu a la nei nual a, Vidal tan thawnthu a danglam lo. Chile international hi Catalan club-in mamawh tawh lo nia an inhriat laiin Juventus chuan lakluh tumin an hel mek. 

Chilean chanchinbu lar La Cuarta-in an tarlan danin Vidal hi Juve boss thar Andrea Pirlo leh goalkeeper Gianluigi Buffon-te chuan a mimal takin an bia a, an club lama kir turin an sawm. 

Vidal hian 2011-2015 inkar khan Juventus tan a khel a, kum 2015 khan Bayern Munich zawm turin a chhuahsan. Bayern aṭang hian kum 2018 khan Barcelona hi a pan leh a, tunah chuan Barca duh loh zingah a tel ta. Bayer Leverkusen aṭanga European football-a hmelhriat hlawh Vidal hian season hman zawh takah khan Barca tan match 43 khelin goal riat a khung a, assist vawi thum a nei - a la hmantlak viau tihna a ni. 

Indian Super League club Hyderabad FC coach Albert Roca chu Barcelona-in lakluh tumin an hel a, Hyderabad lam chuan an coach hi Barca-in an dawr ngei thu an sawi.

Ronald Koeman-a'n Barca enkawl turin kum hnih chhung atan contract a ziak a, a coaching staff zinga tel turin Alfred Schreuder leh Henrik Larsson lalut tawh mah se Roca hi a duh belh. Hyderabad club thuneitu zinga mi, a hming tarlan loh chuan, "Barcelona aṭangin dawrna a awm ngei a, mahse thuchiang zawk kan la ngaichang rih. Roca tan chuan sawmna duhawm tak a ni a, mahse club pawhin kan tana ṭha tur kan ngaihtuah ve tho a ngai a ni," a ti. 

Bengaluru FC boss hlui Roca hian May 2022 thleng cham turin Hyderabad FC-ah hian contract a nei a, ISL lama cham ai chuan a club hluia kir hi a thlang zawk ngeiin a rinawm. Kum 57 mi coach hian 2003–2008 inkarah khan Barca assistant coach hna hi a lo chelh tawh a, hetihlai hian Dutch manager Frank Rijkaard thachhang dawltu a ni. Rijkaard-a'n Galatasaray leh Saudi Arabia-a enkawl thlengin Roca hi assistant coach atan a hmang a, Dutch coach tho Koeman hian Rijkaard-a rinrawl hlui hi hman ṭangkai theih a inbeisei niin a lang.