Vawiin chhun dar 12:30-ah Aizawl FC vs Mizoram Police FC

LZ Juice MPL11-ah I League club Aizawl FC leh champion lai Mizoram Police te vawiin chhun dar 12:30 hian RG Stadium-ah an khel dawn.

Season liam ta khan Aizawl FC-in semifinal khel pha lo mah se kuminah an inthuam ṭha a, champion ngei an tum. Police pawhin nomawi humhim an tum a, an huaisen ngaiin an la huaisen reng.

Victor-a a nghet

Aizawl FC chuan team enkawl turin foreigner emaw state pawn coach emaw an la dawn lo. Mizo club hian thuchhuah siamin team enkawl mektu Victor Lalbiakmawia chu head coach a nih tur thu an puang.

I League-ah B. Malsawmzuala'n Aizawl FC hi enkawl tawh mah se Sawmtea erawh head coach a ni lo a, head coach awm loh vanga coach lak lailawk a ni.

I League head coach ni tur hian AFC A Licence tal a ngai a, Victor hi Mizo zinga I League-a head coach hmasa ber a ni dawn. Head coach atana nemngheh a nih hnua a match hmasa ber tur chu Mizoram Police a ni dawn a, a awlsam dawn lo.

Chak tum AFC

I League club hi an match hmasa bera Chawnpui nen an inhnehtawk hnuah match hnuhnung berah Chanmari nen goal awm loin an inhnehtawk. AFC hian season liam taa MPL club lakah chak an la nei lo tihna a ni.

Aizawl FC coach Victor Lalbiakmawia chuan, "Vawi hnih kan inhnehtawk tawh a, league round-a pakhatna nih kan duh a nih chuan chak zel a ngai. Police lakah pawh point thum hlawhchhuah kan tum ang," tiin chak tuma an khelh tur thu a sawi.

MPL11-ah hian league winner lawmman a awm tawh dawn a, Aizawl FC-in point 12 hmuh theih aṭanga point riat chauh an hmuh avangin league winner ni tur chuan chetsual a thiang tawh lo.

An inthuam ṭha

Nipui transfer hun a la inhawng reng a, Aizawl FC an la inthuam ṭha zel. AFC-in Samuel Lalmuanpuia leh Lalruatthara te an la lut a, training an neih tawh avangin a ṭul dan a zira chhawr theih an ni tawh.

Samuel-a hi season liam taa I League-a Mohammedan SC champion puitu zinga mi kha a ni a, Aizawl FC-in attacking midfielder an mamawh avangin Samuel hi an mamawh tak player a tih theih. Tlarhnungah Lalmuanawma (Munez) leh Rohmingthanga te an chhuah avangin centre back Ruatthara an la lut hi chanchin lawmawm a ni thei ang.

Chutihrualin match fitness a pawimawh avangin Samuel leh Ruatthara ten bul an ṭan a la rinawm loh zawk. Aizawl FC-in tlarhnung an thlak danglam a rinawm loh a, academy aṭanga senior team-a sawn chhoh C. Zomuanpuia (Muantea) a rintlak a, match zawng zawng a la khel kim vek.

Striker C. Lalhriatpuia thlawp turin Chawnpui FC aṭanga an lak Peter Lalrinhlua'n bul a ṭan leh a rinawm a, winger-ah Lalbiakdika a che ṭha ṭhin a, bul a ṭan leh ngei dawn. BD-a awm lohna lama awm turin Augustine Lalrochana bakah player thar pahnih Sawma Tlangte leh Laltlanzova te an awm a, coach Victor-a'n duh thlan tur a nei ṭha hle.

Point 3 duh Police

Mizoram Police-in Chanmari FC an hneh tawh lo a, SYS FC an hneh lo leh bawk. Lalbiaksanga Colney hote chungah beisei sang lo hman mah se MPL9 champion Chawnpui lakah tho chhuakin 3-0 in an chak.

Police coach BS-a Colney-in MPL kal hmang a hria a, a naute a hrechiang tih a lang. MPL11 ṭantirh lama inlan thei lo Lalfakzuala a rawn kir bawk nen, Police team an insawhnghet leh ṭan tawh.

Mizoram goalkeeper F. Lalmuanawma a ha zai vangin khel thei lo mah se Chawnpui an khelh ṭumin R. Malsawmkima (Mana) a khel ṭha. Armed Veng South tlangval Mana hian Aizawl FC lakah fiahna hautak zawk a hmachhawn dawn.

Police hian MPL11-ah goal riat an khung tawh a, goal hnih khung thei chu 'civil player ' F. Lallawmkima leh Isaak Malsawmkima te an ni a, AFC lakah pawh Lawma leh Isak te hi an pawimawh leh dawn. Chutihrualin no. 9 atana chhawr Malsawmfela ke a la hmui tawk lo a, Ramhlun South striker hi hahdamna hun an pe a nih chuan Lalnunsanga (Talea) tan hming chherna remchang a ni thei ang.

Lalbiaksanga Colney chuan, "Aizawl FC hi an ṭha a, winger phei chu a nei ṭha ber an ni hial ang. Mahse, chak lohna lai nei an ni a, an tlarhnung a phui bik lo. I League club lakah hian goal khung hma a pawimawh dawn a, point thum hlawhchhuah ngei tumin kan khel ang," tiin Vanglaini a hrilh.