A chung berah Chanmari

LZ Juice MPL11-ah Chanmari FC-in nimin khan Sihphir Venghlun 3-0 in an hneh a, Lalsangzuala Hmar hote hi point 15 hmuin hmahruaitu an ni. I Day Football khelh zui a nih dawn avangin Chanmari hi a chung berah hahdam takin an awm rih thei ang.

Nimin inkhelah hian MS Dawngliana'n goal hnih a khung a, Moses Lalrinzuala'n Chanmari FC tana a goal hmasa ber a khung bawk. Keeper Zothanmawia'n (T. Mawia) penalty a dan zarah MPL11-ah goal an la chhuah lo.

Goal a lut lo

Chanmari leh Sihphir Venghlun te hi goal khung thiam leh goal veng thiam inkhel tia sawi theih a ni a, first half-ah goal a lut lo. Chutihrualin inkhela chungnung zawk erawh Chanmari an ni a, Sihphir Venghlun tlarhma an che thei lo.

Chanmari erawhin goal khung lo mah se ṭum khat aia tam Sihphir Venghlun tlarhnung an rum ṭhaih. Lalnunzama'n inkhelh tir lamah a chance neih a hmang ṭangkai lo.

Dawngtea pawhin box pawn aṭangin goal kilah pet mah se keeper Lalhruaizela'n ṭha takin a dansak. Bawngkawn forward hian injury time-ah ṭha zetin a la lut a, box chhungah thle mawi viau mah se goal ban a pet per.

A goal ta

Chanmariin second half-ah bul an ṭan ṭha a, KC Malsawmsanga penatly hlawhchhuah chu minute 49-naah Dawngtea'n a khung. Chanmari forward hian goal laiah a pet!

Sihphir Venghlun an tlawm nghal lo a, Lalawmpuia'n Chanmari defender Lalhmangaihsanga lakah penalty a hlawh chhuak. AwP-a'n a penalty hlawhchhuah hi petin keeper T. Mawia'n a dang.

Chanmari keeper T. Mawia a che ṭha a, chutihrualin hun tawp lamah erawh ball a ken rei avang leh a pet chhuah ṭhat loh avangin Sihphir Venghlunin an hrem teuh hle.

Minute 60-naah Dawngtea'n player special a nihna a rawn pholang a, box chhungah insiamremin kawh zetin a pet goal. Dawngtea'n MPL11-ah goal li a khung tawh a, top scorer a beisei ngam ang.

Chanmari winger-ten goal khung an harsat a, Moses Lalrinzuala a rawn inlar. Khatla East tlangval Moses hian bench aṭanga rawn lutin PC Rosangzuala hnathawh ṭhat chu goal-ah chantirin, 3-0 in inkhel a tawp.