Bethlehem nge tho chhuak dawn Chawnpui?

LZ Juice MPL11-ah FC Bethlehem leh Chawnpui FC ten bul an ṭan fuh lo a, chak hmel pawh an la hmu lo. Table mawng lama awm pahnih hi vawiin tlai dar 3:30 hian an inkhel dawn a, inkhel a nung ṭha khawp ang.

Bethlehem hian match hnuhnung berah inelnaa bul ṭan ṭha SYS FC an chelh a, mahse hemi hma hian Chanmari FC, Ramhlun Athletic leh Sihphir Venghlun te an hneh lo vek. FCB hneh loh zingah team thar Ramhlun Athletic leh Sihphir Venghlun te an tel avangin an dinhmun a ṭha lo a, ICU-a awm ang an ni.

Bethlehem tan Chawnpui hneh a ṭul a, chutihrualin chak loh a thiang lo - a chhe berah draw a ngai. Point hlawh chhuak turin coach Lalhriatpuia Sailo-in tlarhnung a rem phui a ṭul a, captain Malsawmdawngkima a chesual thiang tawh lo. FCB hian goal 10 ngawt an chhuah tawh a, tlarhnung tihphui hi an hna hmasa a ni thei ang.

Hriatpuia Sailo hote hian match li aṭangin goal nga an khung a, Danny Zorammawia'n goal hnih khung tawhin Thanga Hmar, Joseph Lalṭhafela leh Varun Raj Tamang ten goal khat ṭheuh an khung. Mak ang reng takin Danny hi match hnuhnung berah injury time-ah chauh a lut.

Chawnpui hi I League-a hming chher tawh B. Malsawmzuala hoin khel mah se beisei an pha lo. Chutihrualin Chawnpui fixtures hi a hautak ve hrim hrim a tih theih a, champion rinkai pathum Aizawl FC (1-1), Chanmari FC (0-2) leh Mizoram Police (0-3) te an hmachhawn vek tawh. I League club leh SYS FC lakah point khat ve ve hmu mah se Chanmari leh Police te hneh loin goal pawh an khung lo.

Coach Sawmtea hian tlarhma leh tlarhnung a siam ṭhat ve ve a ṭul a, chutihrualin kai thar Bethlehem an hmachhawn dawn avangin hna a awlsam hret ang. Chutihrualin Chawnpui hian goal hnih chiah an la khung a, goal 10 chhuah tawh Bethlehem lakah hian khung thei tak maw!