Paris Olympic 2024 : Biles, Djokovic & Lyles - mipui mit fukna tur mi bik!

Infiammi 10,500 chuang an pung khawm dawn a, khawvel ram hrang hrang 206 aṭanga mi bikte chuan Paris Olympic 2024 an hmachhawn dawn - infiamna peng hrang 32 aṭangin gold medal lak theih 329 teh meuh a awm ang.

Mahni kalna kawnga ṭha bik tak tak vek an ni dawn a, mahni ram mi leh hnampuite an ngaihven tlang vek ang. Chung zingah chuan khawvelin a ngaihven bik an awm leh dawn, chung mite chu kan tarlang dawn a ni.

Simone Biles (US) - Gymnastics

Kum thum liam ta kha chuan, miten khawvela Olympian ropui berte zinga mi Simone Biles chu a hun a liam ta niah an ngai hman a, harsatna hrang hrang vangin Tokyo Games pawh a hmachhawn mumal thei lo a nih kha.

Tokyo Games tawp lamah a lo kir a, a vawi sarih nan Olympic medal chu a la leh ta tho. Nikum June thla khan infiamna khawvelah a lo kir pangngai leh a, khawvel huap inelna lian World Championship-ah medal panga a la leh der tawh.

Biles chuan, "Tokyo lama harsatna ka neih ang kha chu a thlen nawn tawh loh ka beisei, tunah chuan inelna hmachhawn turin ka rilru leh taksa pawh a inpeih tawh a ni," tiin a sawi a, rilru lama harsatna a neih ṭhin chu a hneh tawh a ni.

Novak Djokovic (Serbia) - Tennis

Olympic gold medal hi la thei hlauh se la chuan Novak Djokovic-a lunglawm a kim ngei ang. Grand Slam nomawi 24 tehmeuh neiin midang chunga leng ni mah se, infiamna khawmpui lian berah hian a la champion tlat lo.

Tokyo 2020 kha a tan hun ṭha bika ngaih a ni, major tournemant paliah a champion vek - Olympic champion kha ni tel thei ngat se la chuan tuma la tih theih ngai loh 'Golden Slam' nih theihna hun a nei, mahse, semifinal-ah Alexander Zverev a hneh lo a ni.

Tunah chuan kum 37 mi a ni tawh a, a vanglai a pel ve ta - a tan Olympic hnuhnung ber pawh a nih a rinawm tawh. Season a hmang ṭha lo a, nomawi chawi la nei lo chungin Paris a pan, ram hmangaihtu hi a kaw tawpah a ṭan dawn avangin a hmuhnawm ang.

Katie Ledecky (US) - Swimming

Olympic gold medal pasarih a nei tawh a, tunah kum 27 mi niin Katie Ledecky hian a vanglai a hmang mek a, tuin nge dang thei ang tih chu zawhna lian tak a ni mek, a elpui turte tan a huphurhawm khawp ang tih chu thil chiang a ni.

Hmeichhe swimmer Olympian zinga gold medal la hnem ber chu Jenny Thompson (8 gold medal) a ni a, a record duhawm tak hi tluk turin gold medal pakhat chauh a mamawh tawh, a khum a nih pawhin a mak lo ang.

Paris Olympic-ah hian 400m freestyle, 800m freestyle, 1500m freestyle leh 4x200m relay huangah United States aiawhin a inlan dawn, tun hnai kum 13 chhungin inelna a hmachhawn hoah vawi khat chiah chak loh a nei a, tun ṭumah pawh hian rinkai a ni.

Noah Lyles (US) - Athletics

A hming hi lo chhinchhiah rawh u - Paris Olympic an neih zawhah meuh chuan 'Noah Lyles' hian khawvel hriat a hlawh lehzual ngeiin a rinawm, mipa intlansiak chi hrang hrang palia gold medal la thei tura beiseiawm berte zinga mi a ni.

World Championships 2023-ah khan Lyles hian 100m, 200m leh 4x100m huangah gold medal a la vek, tun ṭumah hian team inelna 4x400m relays huangah a tel dawn bawk a, en bik hlawh tur a ni chiang hle.

American tlangval hian Paris Olympic gold medal lak mai bakah, mi ropui Usain Bolt-a record lo ding tawh sa chu khum ngei a tum tih a sawi bawk a, Jamaican sprinter Bolt khum tur erawh chuan tun hma lama a tih theih ngai loh a tih a ngai dawn tihna a ni.

Faith Kipyegon (Kenya) - Athletics

Olympic 1500m champion vawi hnih a ni tawh a, tun ṭumah hian 1500m leh 5,000m huangah a tel dawn, a inlanna tur pahnihah hian nikum khan World Championship a lo hmachhawn tawh a, pakhatna a ni ve ve a ni.

Tun hma chuan 5,000m-ah world record a lo chelh tawh a, hun rei tak kawng thui intlansiak a chawlhsan hnuin nikum khan a lo kir, kum riat hnua a intlansiak leh pawhin khawvela a ṭha berte zinga mi a la ni phak.

Kum 2018 khan fa a nei a, hei hian a rilru put hmang nasa takin a tidanglam - nu a nih hnuah a paukhauh sawt! Khawvel huap gold medal pali a lak zinga pathum chu nu a nih hnuah a ni hial, tunah kum 30 mi a ni tawh a, a tan Olympic hnuhnung a ni tawh ang.

Antoine Dupont (France) - Rugby sevens

Mi bik a ni a, a kalna lamah chuan mite ngaihven a ni ṭhin. Antoine Dupont hi Rugby XV huanga inlan ṭhin a ni a, mahse Paris Olympic khelh a duh avang hian nikum khan Rugby Sevens huangah a insawn ta zawk a, kawng a hmu chhunzawm bawk.

XV-ah khan mi tam tak chuan khawvela a ṭha berah an ngai, an ram France tan pawh Captain a ni. Kumin March thla khan Sevens huangah an ram a champion pui a, kum 19 hnua an hlawhtlin lehna hmasa ber a ni hial.

Kum 27 mi Antoine Dupont chuan, "Kan ramah gold medal lak ngei kan tum," a ti. Rio 2016 khan quarterfinal-ah Japan an hneh lo a, inelna hnuhnung Tokyo Games-ah khan an tling lo, kuminah champion thut chu a awlsam lo mai thei.

Neeraj Chopra (India) - Athletics

India infiammite rilru put hmang nasa taka thlak danglamtu a ni a, khawvela mihring tamna ber rama cheng a nih miau avangin Neeraj Chopra hian ngaisangtu pawh a ngah - instagram lamah mi maktaduai kua chuangin an zui (follow) a ni.

Olympic track and field bikah Indian mi zinga Olympic gold medal la thei hmasa ber a ni miau a, Asia khawmualpuiah pawh fei khawh (javelin) ah chuan Olympic gold medal la thei hmasa ber a ni bawk.

Tun ṭumah hian a elpui ber tura ngaih chu Arshad Nadeem a ni. Ani hi Pakistan tlangval a ni thung - India leh Pakistan boruak chu sawi nawn a ngai lo, chuvangin ram pahnih chhuanvawrte inel tur hi khawvel ngaihven bik a ni dawn.

Olha Kharlan (Ukraine) - Fencing

World champion vawi li a ni tawh a, hei hian a theihna sanzia chu a nemnghet. Mahse, Ukraine leh Russia buaina vangin Olha Kharlan hi Paris Olympic hmachhawn thei lo dinhmunah a ding zuai a, a tawpah erawh a tan kawng a inhawng.

Nikum World Championship-ah khan Kharlan hian Russian mi Anna Smirnova a hmachhawn a, a hneh a ni. Infiamna dang ang bawkin an inhmachhawn zawh hnuah an inchibai ṭhin, mahse, a chibai duh ta lo a ni.

Russia leh Ukraine boruak ṭha lo chu infiamna huangah a seng luh avangin a chungchang ngaihtuah a ngai hial. International Olympic Committee (IOC) president Thomas Bach a inrawlh a ngai a, a tawpah chuan Olympic medal vawi li la tawh tan hian kawng a inhawng ta hram.

Stephen Curry (US) - Basketball

NBA en ṭhin zingah Stephen Curry hming inzawh nawn a ngai lo, basketball chauh ni loin infiamna khawvel ngaihven chuan Curry hming hi an hriat a rinawm, mak deuh mai chu kuminah hian a vawi khat nan Olympic a hmachhawn ve dawn chauh!

United States mipa basketball team hi chu champion chiang tura ngaih an ni ṭhin, kuminah hian a vawi 17 nan gold medal an beisei dawn, an inbuatsaihna match ho thlir erawh chuan kawng a awlsam dawn bik lo niin a lang.

Club tan NBA nomawi vawi li a la tawh a, Most Valuable Player (MVP) atan vawi hnih thlan a nih tawh bakah World Cup-ah vawi hnih a champion tawh bawk, a basketball zinkawng tifamkim turin Paris Olympic hi a mamawh thung a ni.

Shelly-Ann Fraser-Pryce (Jamaica) - Athletics

Shelly-Ann Fraser-Pryce hi kum 37 mi a ni tawh a, ani kum angah chuan infiammi dangte chu an chawl tawh. Tluk leh din fawmin a la kal zel a, a vawi ngana leh a hnuhnung ber atan Olympic a hmachhawn dawn.

Olympic vawi thum champion tawh Fraser-Pryce chuan, "Engkim mai hi a tawp kan thlen hma chuan a zo thei lo," a ti a, a kum tam deuh tawh mah se hmabak hlenchhuah tur neiah a la inngai a ni.

Hliam leh harsatna hrang hrangin tlakbuak ṭhin mah se a tho leh zel a, hei vang hian mite ṭan pawh a hlawh. Tun ṭumah hian Jamaica tan 4x100m relay huangah a inlan dawn, champion lai an nih avangin an buk pawh a rit leh hle ang.

Isabell Werth (Germany) - Equestrian

Olympic dang ang bawkin Paris 2024-ah hian German equestrian athlete Isabell Werth kan hmu leh dawn, ani hian a vawi sarih nan infiamna khawmpui lian ber a hmachhawn leh dawn a ni a, kum 55 mi a ni tawh tih hriat tel a fuh ang.

Sakawr chungchuang huangah a inlan ṭhin a, tun hma lama Olympic vawi ruk a hmachhawn tawhah chuan gold medal a la vek a, hei bakah hian silver medal a la tel bawk, a inlanna huangah chuan khawvela Olympic-a hlawhtling bera chhal ngam a ni.

Olympic bakah hian kum 1994 aṭang khan World Championship-ah pawh gold medal a lo la ṭan daih tawh, chutihrualin kum 2007 bawr aṭang khan khawvel leh Europe khawmualpui huapah pawh champion a harsat ta deuh, kumin hi a hun hnuhnung a nih a rinawm.

Nino Salukvadze  (Georgia) - Shooting

Georgian pistol shooter Nino Salukvadze hi kum 55 mi a ni tawh a, a vawi 10 nan Olympic a hmachhawn dawn - infiamna khawmpui lian berah hian a mikhual lo hle tihna a ni a, inlan tam ber Canadian equestrian athlete Ian Millar a nih rual dawn chiah.

Georgian mi Salukvadze-i'n Olympic a hmachhawn hmasak ber chu Seoul 1988 daih tawh kha a ni a, a rei tawh vang vang hle - tuna chanchinbu chhiartu tam tak pawh hi an la piang lo ang tiin a sawi ngam, kuminah a hmel kan la hmu leh dawn a ni!

Olympic hi hmachhawn tam viau mah se medal lak tak erawh a harsat, a inlan hmasak ber hian 25m Pistol huangah gold medal a la, hemi kum vek hian 10m Air Pistol huangah silver medal a la bawk, a hnu lamah erawh medal a la hlawh chhuak leh rih lo thung.