Durand Cup: A hun a thleng leh ta

Asia khawmualpuia football inelna upa ber Durand Cup chu zanin hian khelh ṭan a ni leh dawn ta a, zanin dar 6:00 hian champion lai Mohun Bagan Super Giant chuan Jammu & Kashmir club Downtown Heroes FC an hmachhawn dawn.

Zaninah inkhel dang a awm dawn lo a, Pathianniah match hnih a awm dawn thung. Tlai dar 4:00-ah Jamshedpur FC leh Bangladesh Army an inhmachhawn dawn a, zan dar 7:00-ah Mohammedan Sporting Club leh Inter Kashi an intawng thung ang.

Durand Cup hi Indian Super League club-ten season thar inbuatsaih nan an hmang ṭhin a, ISL club chu an inlan kim leh vek ang. Anni bakah hian I League club sawm bik leh state league club sawm bikte an tel ṭhin a, sipai club an inlan ṭhin bawk.

Inelna thawnthu

Durand Cup hi kum 1888 khan khelh ṭan a ni a, Asia-ah hei aia inelna langsar a awm lo - Sir Henry Mortimer Durand-a'n Shimla-ah a vawi khat nan he inelna hi a buatsaih a, a hming chawiin neih chhunzawm zel a ni ta a ni.

He inelnaa champion hmasa ber chu British sipai team Royal Scots Fusiliers an ni a, kum 1947-ah India-in zalenna a hmuh hma kha chuan Mohammedan SC chu he inelnaa Indian team champion thei awmchhun an ni.

Champion lai Mohun Bagan chu inelnaa champion ngun ber an ni a, vawi 17 ngawt Durand Cup-ah hian an champion tawh. Nikum khan final-ah an hmelma kumhlun East Bengal chu 1-0 a hnehin champion nomawi an chawi.

A buatsaihtu

Kumin Durand Cup hi Indian Oil Corporation chuan sponsor-in, hei vang hian Indian Oil Durand Cup tih deuh kher a ni. Durand Football Tournament Society chuan inelna hi buatsaih ṭhinin, Asian Football Confederation leh All India Football Federation hriatpui inelna a ni.

Indian Armed Forces hnuaia Eastern Command leh West Bengal sorkar chuan he inelna hi an thlawp bawk a, ISL club tan chuan pre-season tournament mai mah ni se, league ṭan hmaa team theihna tak tak hriatchian nan a ṭha hle.

Sony Sports Network chuan Durand Cup 2024 hi live-in a pe chhuak dawn a, television lama en duh tan Sony Ten 2 leh Ten 2 HD-ah te en theih a ni ang a, online-a en duh tan Sony Liv lamah a en theih bawk ang.

A hmunhma

Kolkata, Jamshedpur, Shillong leh Kokrajhar khawpuiten tun Durand Cup hi an thleng dawn a, heng khawpui palite hian a group ang zelin inelna hi an thleng dawn.

Group A, B leh C te chuan inelna hi Kolkata khawpuiah an khel dawn a, mipui 68,000 lenna Salt Lake Stadium leh mi 12,000 lenna Kishore Bharati Krirangan-ah te Kolkata hian inelna hi a thleng ang.

Mi 24,424 lenna JRD Tata Sports Complex, Jamshedpur-ah group D match-te khelh a ni ang a, Group E match chu mi 10,000 lenna SAI Stadium, Kokrajhar-ah khelh a ni ang a, Shillong khawpuia mi 30,000 lenna Jawaharlal Nehru Stadium chuan group F an thleng thung ang.

Tute maw?

ISL club 13 chu inelna hmachhawn ngei tura tih an nih angin Durand Cup-ah hian an inlan dawn a, I League club zingah Inter Kashi leh Shillong Lajong chu sawm an nih anga inlan tur an ni.

State league khel club-ah chuan Kokrahjar club Bodoland FC leh Srinagar lama hmunpui nei Downtown Heroes te chu inlan tur an ni a, ram pawn aṭangin Nepal sipai club Tribhuvan Army leh Bangladesh Army te chu inelna hmachhawn turin an lo kal bawk.

India sipai club zingah BSF, CISF Protectors, Indian Air Force, Indian Army leh Indian Navy te an inlan leh dawn a, professional club inlan turah Mizo tlangval an awm nual a, sipaiah an awm nual bawk - Durand Cup-ah Mizo kan hmu leh nual dawn e.

A kalphung

Team 24-in inelna an hamchhawn dawn tihna a ni a, group parukah team pali zel awma ṭhen hran an ni - an inkhelh kual hnuah group tina a sang ber ṭheuh chuan knockout round an lut ang a, pahnihna zinga a tiṭha pahnih an lut bawk ang.

Durand Cup-ah hian round of 16 awm loin, quarterfinal-a khelh nghal tur a ni dawn. Group tin aṭanga hmahruaitu chiah last 8 lut chiang an nih avangin, group stage aṭangin match a 'hot' nghal ang tih a chiang.

August 31, Inrinni tlai dar 5:30-ah final khel tura ruahmanna siam niin, Salt Lake Stadium hian final chu a thleng dawn a ni - Kolkata khawpuiah boruak a 'hot' leh ngei dawn tih a chiang.

Kolkata derby

Durand Cup 2024-a mipui ngaihven hlawh bera chhal ngam chu group A-a Mohun Bagan leh East Bengal awm dun hi a ni - club pahnih hi season hmasa final-ah an lo intawng tawh a, a tawpa hnehna hla chhamtu chu Bagan an ni.

East Bengal-in phuba lak an chak zek zek ang tih a chiang a, an hmelma kumhlun nen group khata an awm ho hi pawi an ti vak lo mai thei - group stage aṭanga petchhuah hi an châk dawn em asin!

August 18, Pathianniah Kolkata derby hi khelh a ni dawn a, group stage match mai mah ni se, club pahnih boruak thlirin, final aia inkhel entu an tam zawk a nih pawhin a mak lo ang.