Player kan lakluh loh chuan a mak ang - Slot

Liverpool boss thar Arne Slot chuan tun nipuiah Reds chuan player la la lut miah lo mah se, player thar an seng lut lo a nih chuan an tan thilmak a nih tur thu a sawi.

Slot chuan, "Team ṭha tak kan nei sa a, ka squad neihah hian ka lawm hle. Chutihrual chuan tun nipuiah player lakluh kan nei miah lo a nih chuan thil mak tak chu a ni ve ang.

"Chuvang chuan player thar chu kan la lut em em ang. Tunah chuan chawlh hmang mek player-te an lo kir vek a, kan mamawh tak kan lakluh theih hun kan nghak a ni," a ti a, a hmanhmawh lo.

Liverpool hi pre-season tour neiin US-ah an zin mek a, tukin zing dar 5:00-ah Real Betis nen inkhelin, Euro leh Copa America khelh vangin Trent-Alexander-Arnold, Alisson, Luis Diaz, Cody Gakpo, Joe Gomez, Alexis Mac Allister, Darwin Nunez leh captain Virgil van Dijk ten squad an la zawm ve thei rih lo a ni.

Slot chuan, "A hma pawh khan ka sawi tawh a, ka player neihsate nena thawhho phawt ka mamawh. Player kan la kim thei rih lo hi thil tiharsatu pakhat chu a ni ngei a, team ṭha tak kan neih sa avangin player thar tan pawh a awlsam lo ang," a ti.

Reds hian coach Jurgen Klopp chhuah hnuah indinthar hna an thawk mek a, club sporting director hlui Michael Edwards chu ko kirin, Chief Executive of Football hna a chelh mek a, Bournemouth technical director hlui Richard Hughes chu Sporting Director a ni ta bawk.

Liverpool hian player thar lei piahlamah a awm sa chelh lamah hmabak an nei mek. Player langsar Alexander-Arnold, Mohamed Salah leh Van Dijk te chuan kum khat bak contract an nei tawh lo a, Slot chuan contract thar chungchang chu vantlang hriata sawi a tum loh thu a sawi.