Bordeaux a tawp dawn ta

Ligue 1 club hlun ṭhin Bordeaux chuan professional club anga kal zel an tumna chu an bansan a, vawi ruk ngawt French champion lo ni tawh hi professional club an ni tawh dawn lo.

Season hman zawh takah khan Bordeaux hian Ligue 2 an khel a, mahse, sum leh paia an dinhmun a ṭhat loh avangin French Football Federation chuan an ram third division, National 1-ah a relegate tir.

Mahse, Bordeaux hian French football thuneitute thurel hi ngaihtuah nawn turin an ngen a, hetihlai hian club hralh tumin hma an la reng bawk. Mahse, Fenway Sports Group nen an indawr reng hnuah Liverpool neitu FSG hian an indawrna hi an titawp a, sum sen tur a tam avangin French club hi an lei duh leh lo.

FSG nen an indawrna a tlawlh leh takah chuan, Bordeaux hian French Football Federation-in an relegate tirna ngaihtuah nawn tura an thlen chu an hnukdawk a, professional football club an nihna chu an kalsan thu FFF hi an hrilh ta thung.

Zinedine Zidane, Bixente Lizarazu, Aurelien Tchouameni leh Jules Kounde te pawh an lo khelh tawhna Bordeaux chuan, "Harsa viau mah se, hma hun thlirin hetianga thutlukna siam mai hi a ṭul ta a ni," an ti.

Bordeaux hian an club player-te contract zawng zawng chu an titawp nghal a, team training centre pawh khar nghal a ni. Hetihrual hian youth academy erawh an la kalpui reng dawn a, sum dinhmun ṭha zawk nen Ligue 1 an la khelh leh theih ngei an beisei thu an sawi.

Liverpool winger hlui Albert Riera enkawl Bordeaux hian Ligue 1 nomawi vawi ruk an lo chawi tawh a, Coupe de France (4) leh Coupe de la Ligue (3) ah te champion nomawi an lo chawi tawh bawk.