Villa-in Jhon Durán hralh phal

Season thara Champions League khel tur Aston Villa-in club dinthar hna an thawk mek zel a, player lakluh piah lamah a hralh lamah pawh hma an la zel - kum 20 mi striker Jhon Durán chu a chhuak hnai leh tawh.

Colombian striker hian January 2023 khan Villa hi pound maktaduai 14.75-in a zawm a, £3mtd pek belh theih tura tih a ni. Mahse, Major League Soccer club Chicago Fire aṭanga an lakluh player hian beisei angin hmun a chang lo.

Season hman zawh takah khan inelna hrang hrangah match 37 khel mah se, match 10-ah chiah bul a ṭan a, goal riat a khung. Hei vang hian Duran hian a khelh phakna tur club melh a hnial lo a, West Ham chuan lakluh an duh nia sawi a ni.