Cherries-in Juve defender la dawn

Bournemouth chuan Juventus defender Dean Huijsen la lut turin Italian club hi inremna an neihpui a, pound maktaduai 12.6-in an la lut dawn - Cherries-ah hian medical a nei ang a, a paltlang chuan Premier League club hi a zawm ang.

Kum 19 mi centre back man zat hi £15.2mtd thlenga sang chho thei tura tih a ni a, Juve tan match khat chiah a khel hman. January thla khan AS Roma chu loan-in a zawm a, match 14 khelhsakin, goal hnih a khung.

Netherlands-a piang, Spain khua leh tui nihna neitu Huijsen hian Netherlands tan Under-19 thleng chu age level-ah a khel a, March thla khan Spain U21 kohna chhangin, age level-ah ram tana a inlanna a sawn.

Cherries hian season tharah Premier League tikimtu nih an tum lo a, Huijsen hma hian loan-a an hawh sa Luis Sinisterra chu £20mtd-in Leeds United aṭangin a nghetin an la tawh bawk.

Anni bakah hian Getafe forward Enes Unal (£13mtd), Wellington Phoenix goalkeeper Alex Paulsen (£850,000), Sheffield United striker Daniel Jebbison (£1.5mtd) leh Portsmouth forward Koby Mottoh (free) te an la lut tawh.