Momota a la chawl rih dawn

Kento Momota chu a hliam a la dam fel thei lo a, a la chawlh rih a ngai dawn. World number 1 hi thla thum chhung vel chu a chawlh rih a la ngai dawn tihna a ni.

January 13 khan Malaysia-ah Momota hi motor-in an chesual, hetah hian a hnar ruh a tliak. Japan tlangval Momota hian kar hmasa khan an ram team bulah training nei leh tawh mah se a dinhmun a ṭha rih lo, a mitah hliam tenau a nei leh bawk.

Japanese Badminton Association secretary general Zeniya Kinji chuan, "A mit dinglam hliam chu Inrinni khan hlawhtling taka zai a ni, amah zaitu doctor chuan thla thum tal a chawlh leh rih a ngaih tur thu a sawi," a ti.

Kum 25 mi Momota hi Rio Olympic-ah khan hrem a tawh avangin a inlan thei lo, kumin nipui laia neih tur Tokyo Olympic-ah erawh champion tura rinkai an ni ang. March thlaa khelh tur All England Open Championships-ah pawh a nomawi kawl lai humhim tura a rawn kir hman beisei a ni.