Mizo club-in I-League U19 final round an khel dawn
I League Under 19 Northeast Zone aiawh tur chu Mizoram club Aizawl FC emaw Chanmari FC emaw an ni ang. Mizoram Premier League Season 3 finalist Under 19 team-te hian Inrinni khan Lammualah an khingpui Meghalaya club an hneh ve ve a, Northeast Zone aiawh tur chu Nilainia Aizawl FC leh Chanmari FC te inkhelin a hril ang.
Inrinni inkhel hmasa zawkah Aizawl FC-in K. Lalṭhathanga goal hmangin Shillong Lajong 1-0 in an hneh a, inkhel hnuhnung zawkah Chanmari FC-in Royal Wahingdoh 3-1 in an hneh ve bawk. Wahingdoh hian Kitboklang Pale hmangin hma hruai hmasa mah se Chanmari FC hian K. Lalchhanhima goal hnih leh Lalawmpuia goal khat hmangin an lehthal.
Goal khat a tawk
Shillong Lajong-in an Mizo player pathum Lalrammuana, Samuel Lalmuanpuia leh Isaac Vanmalsawma te starting eleven-ah an dah a; Aizawl FC-in inhliam vangin wing back Vanlalruata an chhawr thei lo.
Aizawl FC hian match vawi hnihnaah midfield tidanglam hret mah se wing back Teruata awm loh an tuar a, Shillong Lajong lakah inkhel an thunun thei lo.
Minute 90 chhungin team pahnih an inhnehtawk a, game nung tak an khel a, a tawpa Shillong club leh Aizawl FC danglamna chu Puitea a goal a ni.
Eng nge an sawi?
Aizawl FC coach Nicky Malsawmtluanga chuan, "Chak result kan nei thei a, kan lawm khawp mai. Kan duhthusamin khel lo mah ila ka naute khelh danah ka lawm a, final round thleng turin beiseina sang tak ka la nei a ni," tiin a sawi.
Nicky chuan sawi chhunzawmin, "Chanmari FC game hi a inthlak hlawk hlawk a, an khelh fuh leh fuh loh kar a hla ve hle. Kan team erawh kan khelh dan a pangngai reng a, hmasawn thei kan la ni bawk. Ka team-te hi final round khel turin ka ring tawk a, Pathian kutah kan innghat e," tiin a sawi.
Shillong Lajong manager Sambha Shallam chuan, "Team ṭha zawk an chak a ni. Ka player-te an khel ṭha tawk lo a, kan zir angin an khel chhuak lo a ni. Aizawl FC leh Chanmari FC te duhsakna ka hlan," a ti.
Penalty a langsar
Inkhel hnuhnung zawkah Chanmari FC leh Royal Wahingdoh te'n inkhelh ṭan tirh phat aṭangin game nung tak an lantir a, team pahnih an inbei tawk hle.
Minute 26-naah Wahingdoh-a Mizo player starting eleven awmchhun Lalmuanzuala chuan Zosangliana ball chhuhsakin Kitboklang Pale tan ball ṭha a siam sak a, Kitboklang-a'n Shillong goal hmahruai a khung.
Chanmari midfielder Chhaia'n a tihsual vanga goal an chhuah hnuah a insiamṭha a, Sairuatkima aia lut Chhaia hi midfield-ah a ṭangkai hle. Minute 37-naah Tetepuia hmangin Chanmari-in an siphurh an sut a, first half-ah 1-1 a ni.
Second half-ah Chanmari winger Vanlalbiaa chuan Wahingdoh keeper Kenio Lyngkhoi lakah penalty a hlawchhuak a, referee thutlukin nain sawi zui a hlawh hle. Tetepuia'n penalty hi petin, minute 57-naah Chanmari hmahruaina goal a khung.
Chanmari hian inkhel an thunun chhunzawm a, Wahingdoh-in inhliam vanga khel thei lo defender Vanlalzuia an tuar hle. Minute 68-naah Lalawmpuia Chanmari goal thumna a khung a, 3-1 in inkhel a tawp.
Eng nge an sawi?
Chanmari FC coach Lalsangzuala Hmar chuan, "Penalty kha ka hmu chian loh avangin ngaihdan siam a harsa. Mabiaa chuan keeper-in a khawih fuh ngei thu min hrilh. Ka sawi duh zawk chu inkhelh ṭan tirha referee-in penalty min pek loh kha a ni. Hnai tak aṭangin Wahingdoh player handball kha a hmu a, penalty min pe lo," tiin penalty chungchang a sawi.
Inkhel chungchang sawi zuiin, "Ka player-te a hma aiin an khel ṭha a, kan khelh ṭhat zel pawh ka beisei. Team zawng zawng hi kan intluk tlang vek a, a vannei berin final round an khel ang," a ti.
Wahingdoh head coach Bobby Nongbet chuan, "Kan khel ṭha ve ve a, inkhel level pawh a sang. Inkhel tidanglamtu chu referee a ni. Penalty kha thutlukna dik a ni lo. Mizoram-in min thlen danah sawisel tur ka nei lo a, MFA pawh ka dem lo, mah se referee thutlukna erawh kan chak lohna chhan a ni," tiin referee chungah a lungawi lo hle.
Bobby chuan, "Kan inelna hi India ram pum huap a ni a, chuvangin local referee kan hmang hi a dik lo. National level-ah chuan neutral referee an awm tur a ni. Shillong-ah local referee-in inkhel kaihhruai se a dik ka ti chuang lo. Neutral referee awm loh pawhin neutral ground-ah khelh ni thei se lungawi lohna tur a awm lo," tiin a sawi.
Inkhel thlirna tawi
February 7, Inrinni
Aizawl FC 1 - 0 Shillong Lajong
AIZ : K.Lalthathanga 59'
Chanmari FC 3 - 1 Royal Wahingdoh FC
CFC : K.Lalchhanhima 37', 57'(P); Lalawmpuia 68'
RW : Kitboklang Pale 26'.
Team Dinhmun
# Team PLd W D L GF GA GD Pts
1 Chanmari FC 2 1 1 0 3 1 2 4
2 Aizawl FC 2 1 1 0 2 1 1 4
3 Shillong Lajong FC 2 0 1 1 0 1 -1 1
4 Royal Wahingdoh FC 2 0 1 1 2 4 -2 1