Atletico-in Real an sawp

Inrinni zan Madrid Derby-ah Atletico Madrid tan Tiago, Saul Niguez, Antoine Griezmann leh Mario Mandzukic te'n goal an khung a; Cristiano Ronaldo telna Real Madrid-in goal an khung ve lo. Vicente Calderon-ah Atletico-in Real 4-0 in an sawp.

Real an buai

Real boss Carlo Ancelotti-a'n inhliam vangin Pepe, Sergio Ramos leh James Rodriguez te a chhawr thei lo a, hrem vangin Marcelo a hmang thei lo bawk. Inkhelh hma hauhin Real an buai a, match hnih hrem hnua rawn kir Cristiano Ronaldo chu Real beiseina siamtu a ni.

Buaina a zual

Real-in tlar hnungah player naupang Nacho leh Raphael Varane te defence laiah an inkawp tir a, Marcelo aiah Fabio Coentrao luh tir an ni.

Atletico midfielder Koke chu ṭan aṭanga minute 10-na lekah inhliam vanga thlak a ni a, a thlaktu Saul-a'n minute 18-naah mawi lutukin a scissor kick goal. Hemi hma minute li hian Tiago-a'n mualneitu hmahruaina goal a khung a, keeper Iker Casillas-a'n a hna a tlin tawk lo. Atletico supporter-te Real keeper au el nan 'Iker, Iker' tiin an au rual.

Second half-ah Real an che thei chuang lo. Minute 67-naah Arda Turan cross chu Saul-a'n Real defender Dani Carvajal a tauh khal a, Griezmann-a'n a hnampui Varane-a venna karah awlsam takin a khung.

Goal thum luh hnuah Real an che thei tawh lo a, Tiago thlaktu Fernando Torres-a cross ball chu minute 89-naah Mandzukic-a'n goal-ah a chantir a, 4-0 in inkhel a tawp.

Real Madrid-in an tlar hnung phui loh an tuar a, hma taka goal hnih an chhuah avangin Ronaldo, Karim Benzema leh Gareth Bale te an che thei lo; Atletico goal zawnah vawi khat chiah a pet fuh.

Simone thukhawchang

Atletico Madrid coach Diego Simeone chuan, "Kan zir ang thlapin kan khel chhuak thei a, a lawmawm hlein ka hria. Ding lam aṭangin Arda Turan, Griezmann leh Juanfran te hmangin kan nawr ṭha a; Gabi leh Tiago te'n Cristiano Ronaldo leh Karim Benzema te an veng hneh bawk," tiin an game plan a hlawhtlin thu a sawi.

Insawifiahna chu

Real Madrid manager Carlo Ancelotti chuan, "A fuh loh fai vek a ni. Atletico kha kawng engkimah an chungnung a, chak an phu a ni. Chhe takin khel mah ila, league hmahruaitu kan ni chhunzawm zel. Season tawpah tunge sang zawk chu kan hria ang," tiin an khel ṭha lo tih a pawm a, champion ngei erawh an tum thu a sawi.

Ballon d'Or dawngtu Ronaldo chuan, "Position hrang hrangah kan khel chhe fai vek a ni. Atletico hmachhawn tur khan kan in peih tawk lo. Real hi khawvel team engpawh tum se 4-0 a chak lo tur kan ni lo, kan result duhawm loh tak hi kan theihngilh vat a ṭul," tiin a sawi.

French forward Karim Benzema chuan, "Kan khelh fuh loh ṭum a ni. Kan theihna zawng zawng chu kan chhuah a, Atletico an khel ṭha em a ni. Mipuiin phurna kan nei tawk lo ang a, an sawi hi a dik lo," tiin a sawi.

Ngaihnawm

4 November 2010 khan Real Madrid-in El Clasico-ah Barcelona 5-0 in an hneh lo a, tun hi khami hnua an chak loh chian ber ṭum a ni.

4 Kum 1951 hnua a vawi khatna atan Atletico-in La Liga-ah Real Madrid ṭum hnih an hneh lehna hmasa ber a ni.

4 Atletico-in tun season-ah Real ṭum ruk an inkhelh tawhah vawi li an hneh a, inkhel vawi hnihah an inhnehtawk.