Bayern leh Dortmund chak ve ta

Bundesliga-ah champion lai Bayern Munich-in Inrinni zan khan khualmualah VFB Stuggart 2-0 in hneh a, Borussia Dortmund-in table mawngphah chhuahsan turin Freiburg 3-0 in an hneh ve bawk. Bayern leh Dortmund te'n kuminah chak hmel an hmu ta.

Mercedes Benz Arena-ah Bayern Munich-in first half an thunun a, minute 41-naa Arjen Robben-a goal hmangin chawlhlawkah 1-0 in hma an hruai. Second half ṭan aṭanga minute rukna lekah Bayern defender David Alaba-a'n yard 35 aṭangin mawi takin free kick a pet lut a, second half thleng langsar a awm zui lo.

Inkhel tawp thlengin goal dang a luh belh tawh lo a, Bayern 2-0 in an chak.

Bayern coach Pep Guardiola chuan, "Duhthusam in ball kan la chang tam tawk lo, kan tlan tam tawk lo a, hmasawn na tur kan la nei a ni," tiin a sawi.

Bayern hian kumina an match hmasa berah Wolfsburg 0-4 in an hneh lo a, match hnihnaah Schalke nen 1-1 in an inhnehtawk leh bawk. Stuggart an hneh hi kumina an vawi khat chakna a ni.

Bayern-in vawi 20 khelhah point 49 an hmu tawh a, anmahni hnaih bertu Wolfsburg nena an inthlauhna chu point riat a ni. Inrinni zan khan Wolfsburg hian Mizoram-a rawn zin Hoffenheim chu 3-0 in an hneh a, Wolfsburg tan hian Chelsea player hlui Kevin de Bryune-a'n goal hnih a khung bakah Dutch forward Bas Dost-a'n goal khat a khung ve bawk.

Dortmund chak ve ta

Borussia Dortmund-in anmahni ang bawka relegation zone-a awm Freiburg khel turin Mage Solar Stadion-ah an tlawh a, 3-0 in hnehna an chang. Nikum December 6-a Hoffenheim an hneh hnua league-a an chak lehna hmasa ber a ni.

Dortmund hian chak ngei tum in bul an ṭan a, minute kuana lekah star player Marco Reus chuan box-chhung aṭangin a ke veilam hmangin mawi takin a pet goal nghal.

Second hlaf-ah mualneitu Freiburg lamin lehthal ngei tum in nawr mah se Jurgen Klopp a naute an ṭang khawng tlat a, hmun awl an siam sak duh lo. Dortmund tan Gabon striker Francois Aubameyang-a'n second half-ah goal hnih a khung a, 3-0 in an chak.

Dortmund coach Jurgen Klopp chuan,"Vawiin kan chak hi mak ka ti hran lo, inrintawkna nena kan khelh chuan kan team hian theihna kan nei a ni" tiin a sawi.

Season liamtaa Champions League finalist Dortmund-hian Bundesliga game 20 khelh tawhah point 19 hmuin 16-naah an awm mek. An chunga awm SC Paderborn nen point khat chiahin an intlau a, pariatna Hannover nena point ruk chauhin an inthlau bawk.

Inkhel Results

Schalke 04 1 - 0 Borussia M'gladbach

Wolfsburg 3 - 0 Hoffenheim

Mainz 05 0 - 2 Hertha BSC

Freiburg 0 - 3 Borussia Dortmund

Stuttgart 0 - 2 Bayern Munich

Köln 0 - 0 Paderborn

Hamburger SV 2 - 1 Hannover 96