Juventus-in Milan an hneh

Serie A-ah hmahruaitu Juventus-in Filippo Inzaghi enkawlna hnuaia talbuai mek AC Milan 3-1 a hneh a. Inrinni zan inkhel dangah Torino-in khualmualah Hellas Verona 3-1 in an hneh ve bawk.

Juventus-in vawi 22 khelhah point 53 an hmu tawh a, anmahni hnaih bertu leh match khata khel tlem AS Roma aiin point sawmin an sang tawh.

Juventus stadium-ah mualneituin Carlos Tevez hmangin minute 15-naah hma an hruai a, replay aṭanga a lan danin Argentine forward hi a offside. Minute 29-naah Milan player thar Luca Antonelli-a'n a club thar tana a game hmasa berah corner aṭangin a tauh lut.

Milan an lawm rei lo. Minute thum hnuah Tevez-a pass chu Italian defender Leonardo Bonucci-a'n a kheng lut a; second half-ah Juventus tan Alvaro Morata-a'n khung lehin 3-1 in inkhel a tawp.

Juventus boss Massi­miliano Allegri chuan, "Con­centration kan hloh nasa lutukin ka hria. Counter attack kan hmang ṭangkai tawk lo a, ka pass tur kan thlang fuh tawk lo ṭhin. Juve leh Milan inkhel hi chu a harsa hrim hrim a, point thum kan hlawhchhuak thei hi kan lawm," tiin a sawi.

Milan manager Filippo Inzaghi chuan, "Result bik kha dah ṭha ila, kan khel hrim hrim khan inrintawkna thar min pe a ni. Ka player-te rilru put hmang aṭanga thlirin result ṭha kan nei vat dawnin ka hria," tiin a sawi.