Media chunga lungawi lo Blatter

Sepp Blatter chuan media-in Africa Cup of Nation an ziah duh danah a lungawi loh thu a sawi. FIFA President chuan media te chu a ṭha lam aia a chhe lam puanzar nasaah a puh.

Ningani khan AFCON semifinal-a a thlengtu Equatorial Guinea leh Ghana te inkhelh laiin buaina a chhuak a, inkhel entu aṭangin halmawi leh puak thei thil te field chhungah vawmluh a ni.

Police te'n buaina ṭhelh turin helicopter leh tear gas an hman a ngai hial.

Blatter chuan, "Chan­chin ṭha lam hawi chanchinthar awm reng mah se, media lam thlirna aṭang chuan chanchinthar an tling tawh lo. A chhe lam hawi zawng erawh puanzar nuam an ti em em si," tiin a sawi.

Arfica khawmualpuia football thuneitu sang CAF hruaitu Issa Hayatou chuan, "Media hian thu phuah belh an hrat em em a, a bik takin khawthlang media te hian an hrat lehzual," tiin Blatter-a ngaihdan a ṭawmpui thu a sawi.