Gerrard leh Liverpool an chak zo lo

Steven Gerrard-a tana Mer­seyside derby hnuhnung berah Liverpool leh Everton-te goal awm loin an inhnehtawk.

Goodison Park-a Merseyside derby vawi 224-naah Liverpool-in tlar hmaah rin lawk ang ngeiin rawlthar duhawm pahnih Phillipe Coutinho leh Raheem Sterling te an rawn awm a, mak takin kum 19-a upa Jordan Ibe-a'n bul a ṭan bawk. Steven Gerrard-a'n captain armband hrengin Daniel Sturridge erawhin bench a luah lum thung.

Inkhel chu

Liverpool-in inkhel an thunun zawk a, an goal bawh a na zawk bawk. Inkhel ṭan aṭanga minute 10-na leka captain Gerrard-a freekick pet chu Everton keeper Joel Robles-a'n a nam over ṭha hle. Minute hnih hnu lawkah Sterling ball pet kal zel aṭangin Jordan Ibe chuan goal khungna hun ṭha a nei a, mah se Robles a paltlang thei lo.

Minute 16-na lekah Liverpool midfielder Lucas Leiva chu inhliam vangin lakchhuah a ngai a, a aiah Joe Allen luh tir a ni. Liverpool-in inkhel an thunun zel a, darkar chanve hma hretin Ibe -a'n goal ban a pet per, inkhelh hmaa langsar lo Ibe hi field chhungah a langsar hle.

Second half ṭan tirah Everton midfielder Kevin Mirallas-a'n free kick aṭangin goal zawnah a pet thei lo. Liverpool tlar hma an hlauawm chhunzawm zel a, Sterling-a'n vawihnih lai Everton goal rumṭhaih mah se Tim Howard inhliam vanga khel Robles-a'n a dan sak ve ve a. Steven Gerrard bicycle kick ṭha tak chu Naismith-a'n a dang hman bawk.

Liverpool-in goal khung tumin Coutinho aiah Daniel Sturridge an luh tir a, English forward hian goal a keng tel lo. Goal awm loin inkhel a tawp.

Eng nge an sawi?

Liverpool manager Brendan Rodgers chuan, "Ka naute khelh dan khan minti lawm a, inkhelh chhung zawng khan a khel ṭha zawkah kan ṭang a ni. Goal kan khung thei lo kha kan vanduai hlein ka hria,point thum hlawhchhuah kan phu a ni. Season tawpah Champions League kan khelh phak ngei ka ring," tiin chak an phu thu a sawi a, rawlthar Jordan Ibe a fak tel bawk.

Everton manager Roberto Martinez chuan, "Players inhliam kan ngah avangin kan nau te'n duhthusamin an khel chhuak zo lo a ni. First half-ah kha chuan kan khel ṭha zawk . Gerrard-a chance bak kha goal khung theihna tur an nei bik lo," tiin a sawi.

Everton hian inhliam vangin Aiden McGeady leh Leighton Baines te an chhawr thei lo.